Амбасадата на Соединетите Американски Држави во Босна и Херцеговина излезе со соопштение во врска со одлуката на претседателот на Република Српска, Милорад Додик, да потпише укази за прогласување закон со кој се забранува работата на државните институции во овој ентитет, пишува Novidani.
„САД се решени да ги промовираат нашите интереси во Босна и Херцеговина. Нашата посветеност на Дејтонскиот мировен договор и стабилна и безбедна Босна и Херцеговина, која трае триесет години, е непоколеблива, се вели во пораката на американската амбасада.
Тие додадоа дека се „многу загрижени поради синоќешното потпишување на антиуставните и антидејтонските закони“ усвоени од Националното собрание на РС.
„Да бидеме јасни – ова е намерна провокација на уставниот поредок на Босна и Херцеговина и претставува директна закана за стабилноста и безбедноста на БиХ и стратешките цели на Соединетите држави“, соопшти американската амбасада.
„До сите политички лидери, особено оние кои стојат зад овие одлуки, им го кажуваме ова: воздржете се од натамошна дестабилизација и запалива реторика. Вклучете се во конструктивен и одговорен политички дијалог. Поддржете ги демократските институции на БиХ и спроведувајте го владеењето на правото. И направете се што можете за да ги намалите политичките тензии. Граѓаните на кои им служите не заслужуваат ништо помалку“, велат тие.
На крајот, американската амбасада додаде дека тие „цврсто го поддржуваат суверенитетот и територијалниот интегритет на БиХ и нејзиниот пат кон целосна интеграција во евроатлантската заедница на земјите“.