Лидерот на Сојузот на Ромите и татко на градоначалникот на Шуто Оризари Елвис Бајрам, Амди Бајрам денеска на прес конференција ги обвини СДСМ, пратеникот Курто Дудуш и Неждет Мустафа дека биле нарачатели на нападот врз неговиот син, кој синоќа беше претепан во населбата.
Како што рече Бајрам, во јавноста многу работи се прикривале, а МВР се обидувало да го претстави случајот како најобична тепачка. Според него, луѓето кои тој ги посочи најмиле како што рече „некоја позната фамилија“ од Шутка која била позната по насилтво и правеле немири честопати шетајќи со ножеви и со сабји.
На прашањето дали има докази дека посочените биле нарачатели, Амди Бајрам одговори дека Дудуш и Мустафа постојано биле со полицијата за да ги заштитат тепачите. Како пто раскажа лидерот на Сојузот на Ромите, неговиот син бил нападнат откако ги посетувал штабовите на партијата во Шуто Оризари, но на тоа претходел напад на шефот на неговиот кабинет.
Бајрам раскажува дека Елвис бил удрен со метална шипка по што излегле мажи и жени со секири.
Тој се пожали дека дури денеска му дозволиле да го посети својот син во болницата „8 септември“ и увидел дека на градоначалникот на Шутка му бил пукнат черепот. Амди имал кратка комуникација и со министерот за внатрешни работи Оливер Спасовски кој му ветил дека сите изборни инциденти ќе бидат расветлени и затоа го повика веднаш да го расчисти случајот со неговиот син.
Министерството за внатрешни работи преку соопштение денеска информираше дека презема мерки за расчистување на тепачката која се случи вчера на улицата Гвадалахара во населбата Шуто Оризари, а во која повреден беше Елвис Бајрам, градоначалник и кандидат за градоначалник на оваа општина од партијата Сојуз на Ромите.
Од МВР велат дека идентификувани се и повикани на разговор пет лица кои учествувале во тепачката и во постапка е прибирањето докази за понатамошно постапување.