Вкупно 3693 македонски граѓани фигурираат како основачи, директори или партнери во фирми формирани во Бугарија, дознава НОВАТВ. Според документите до кои дојде нашата редакција меѓу нив има двајца пратеници, познати бизнисмени, големи фирми и имиња кои не се познати во јавноста.
Амди Бајрам тврди дека 100 отсто е грешка
Пратеникот Амди Бајрам кој според анкетниот лист доставен до Антикорупциската комисија важи за еден од најсиромашните пратеници, според документите на НОВА во Бугарија бизнисот му цвета. Амди Бајрам и неговото семејство имаат три фирми. Најстара е компанијата Џани Версачи ООД формирана во 2009 година, потоа во 2014 ја создал Евро Шутекс ООД, а годинава во февруари бизнисот го проширил и ја регистрирал компанијата Рентакар Интернационал ООД. Во сите три фирми Амди Бајрам фигурира како директор, заедно со членови на потесното семејство, а во две е и неговиот син Елвис Бајрам – градоначалник на Шуто Оризари. Седиштата на сите три фирми е во Ќустендил на различни адреси.
Овие фирми ни пратеникот – татко, ниту градоначалникот – син ги немаат пријавено во нивните имотни листови. Според анкетниот лист на Амди Бајрам, тој поседува само возило Пежо старо седум години. А, има и кредит кој го подигнал во 2009 година во вредност од 30.000 евра, сума идентична со автомобилот. Неговиот син пак, Елвис Бајрам, во анкетниот лист пријавил дека има куќа која е имот на неговите родители во вредност од 30.000 евра.
Непријавувањето на имот за избрани и именувани функционери е противзаконско дело. Прво, затоа што ги премолчиле во нивната имотна состојба која ја ставаат на увид во Антикорупциската комисија и второ затоа што како функционер Амди Бајрам не смее да има друга функција, ниту пак да биде сопственик во фирма. Побаравме коментар од Антикорупциската комисија, но од таму како и во изминатите години, ни денеска никој не одговори на нашите повици.
Пратеникот Бајрам во телефонски разговор изјави дека тоа било грешка и дека тој не поседувал фирми во Бугарија. Иако како сопственици и партнери се јавува и неговиот син Елвис, потоа членови на неговото потесно семејство Габриел и Шабан, а едната фирма дури го носи и името на неговиот внук Џани Версаче, сепак тој тврди дека тој не е Амди Бајрам од регистарот во Бугарија.
„Грешка е тоа. Можеби е друг Амди Бајрам. Не сум јас тој. 100 посто е грешка“, ни изјави пратеникот Бајрам во телефонски разговор.
Освен семејството Бајрам, фирма во Бугарија има и пратеникот Васил Пишев од ВМРО-ДПМНЕ. Тој е еден од најбогатите пратеници, но за разлика од Амди Бајрам, тој добро го изменаџирал бизнисот во Бугарија. Неговите удели во двете фирми од Благоевград се пријавени, но таму тој не се појавува како сопственик или директор, туку како партнер. Фирмите во кои Пишев поседува удели Ал-макс и Гарантстрои се регистрирани во Благоевград.
Гуштеров, Азманов, Даневски на списокот во бугарскиот Централен регистар
Не се само пратениците, во Бугарија фирма има и бизнисменот Ристо Гуштеров Глобал Груп Интернешнл регистрирана во Варна во 2014 година. Две компании има и градежниот магнат Зоран Азманов, кој во Бугарија поседува две фирми – Настел и Настел Експорт. Свои компании имаат и фирмите Гранит и Цементарници Усје.
Секако, бугарскиот Централен регистар не би бил комплетен ако таму не е контроверзниот бизнисмен Орце Камчев. Тој неодамна го прошири својот бизнис во Бугарија и пред два месеци ја купи најголемата приватна здравствена установа – јапонската болница „Токуда“.
Во Бугарија фирма има и поранешниот градоначалник на Свети Николе Слободан Даневски – Агро Ленд Бугарија. Даневски беше осуден на затворска казна за проневера на пари во време кога бил претседател на Управниот одбор на Агрокомбинатот „Џумајлија“ и во моментов казната ја издржува во затворот во Штип.
Компанија има и членот на Советот на општина Куманово од СДСМ Максим Димитриевски. Тој е еден од сопствениците во МБС Глобал, заедно со уште три други лица. Димитриевски за НОВА потврди дека фирмата е формирана пред скоро две години, но не е активна.
„Точно е дека имам регистрирано фирма во Бугарија, но се уште не е ставена во функција. Сопствен бизнис имам во Македонија веќе 20 години, а фирмата во Бугарија е обид да се прошири и на бугарскиот пазар. Но, засега за жал, се уште не е активна. Уделот во фирмата ми е пријавен во имотниот лист во Антикорупциската комисија.“, изјави за НОВА советникот од Куманово, Максим Димитриевски.