Американската амбасадорка Кејт Мари Брнз, со градоначалничката на Општина Битола Наташа Петровска, вчера попладнето посетиле неколку знаменитости во градот и откриле неколку спомен обележја.
„Во сеќавање на американското училиште за девојки во Битола и американската воспитувачка и мисионерка Мери Луиза Метјуз 1888-1920. Мери Метјуз ќе биде запаметена како една од хероините која наместо да си замине, избра да остане и да им биде подддршка на жените во тешките времиња“, стои на спомен плочата, која свечено беше откриена од страна на градоначалничката Петровска и амбасадорката Брнз на локацијата, на која за време на Првата светска војна, постоело американското училиште.
Пред Американското катче, амбасадорката и градоначалничата , заедно со директорката на Завод и Музеј Мери Стојанова и директорката на Центарот за култура Маја Андоновска-Илиевски, се сретнаа со ансамбл од САД, кој настапува на фестивалот „Илинденски денови“.
Во паркот кај Градскиот часовник пак било откриено спомен обележје на првата американска болница во Битола, која постоела за време на Првата светска војна.
„По завршувањето на Првата светска војна, двете докторки од САД, познати како Ангелите од Битола, д-р Регина Флод Кејс и д-р Францис Мабел Флод, ја отворија првата американска болница во Битола, раководена од жени, со поддршка на Црвениот крст за да му помогнат на локалното население. Мотото на американската мисија беше: „Успеавме да ја добиеме војната, сега мораме да го добиеме мирот“, пишува на спомен обележјето.