Американската тајна служба објави дека вооружен маж бил застрелан и убиен откако влегол во заштитената зона на одморалиштето Мар-а-Лаго на американскиот претседател Доналд Трамп во Палм Бич, Флорида, додека Трамп и првата дама Меланија Трамп биле во Белата куќа во времето на инцидентот, објави „Асошиејтед Прес“.
Иако Трамп често ги поминува викендите во своето одморалиште, тој бил во Белата куќа за време на овој инцидент. Првата дама Меланија Трамп била исто така со претседателот во Белата куќа во саботата навечер, пренесе „АП“.
Според соопштението од Тајната служба, вооружениот маж, чиј идентитет не е објавен, „бил забележан на северната порта од имотот Мар-а-Лаго како носи нешто што изгледало како пушка и канистер за гориво“. Инцидентот се случил во 1:30 часот по локално време во недела.
Осомничениот, млад маж во раните 20-ти години од Северна Каролина, бил пријавен за исчезнат од неговото семејство пред неколку дена.
Истражителите веруваат дека тој ја напуштил Северна Каролина и се упатил кон југ, земајќи пушка по патот, изјави портпаролот на Тајната служба, Ентони Гуглиелми.
Во неговото возило е пронајдена чаура за пиштол, рече Гуглиелми, додавајќи дека тој поминал низ северната порта на Мар-а-Лаго додека друго возило излегувало, а потоа се соочил со агенти на Тајната служба кои го застрелале.
Истражителите работат на составување психолошки профил и утврдување на мотив.
Трамп и претходно се соочи со закани по неговиот живот. Тој беше ранет во обид за атентат за време на предизборен митинг во Батлер, Пенсилванија, на 13 јули 2024 година.
Потоа, на 15 септември 2024 година, маж со пушка беше фатен откако чекал во близина на голф теренот на Трамп во Вест Палм Бич. Тој бил осуден на доживотен затвор претходно овој месец, потсетува „АП“.