Еден ден по емисијата на „Алсат М“ каде што министерот за животна средина Башким Амети налутен рече „дека немало новинарката да ја прашува дали и колку да се вози во автобус“, откако беше запрашан дали и колку често користи автобус, провладини медиуми објавија фотографии од него како на работа оди со автобус.
НОВАТВ дознава дека во Алсат М пред почетокот на снимањето имало дискусија зошто министерот им порачува на граѓаните да се возат со автобус како мерка против загадувањето, а самиот тој до телевизијата на интервју дошол со автомобил, иако далечината е не повеќе од 3-4 минути пеш.
Откако неговите одговори станаа вирални за социјалните мрежи, Амети вчера тргнал со автобус на работа, а провладин портал поврзан со ДУИ го промовираше министерот како свесен за загадувањето објавувајќи фотографија од него како со автобус тргнал на работа.
Тој засега е единстениот функционер, кој макар и за ПР, се качи во автобус.
Министерот за животна средина деновиве беше во центарот на јавноста откако од него се бараа одговори за тоа што преземаат институциите против големото загадување на воздухот. Пред два дена, на прес конференција, Амети тврдеше дека не може да се нареди „пар-непар“ возење и други построги мерки затоа што Македонија била демократска земја. А за препораките како онаа да не се проветрува тврдеше дека се мерки, а не само препораки.