Организацијата за заштита на човековите права Amnesty International денес објави застрашувачки извештај во кој се вели дека во затвор на сирискиот режим биле погубени 13.000 луѓе во последните пет години, од 2011 година до 2015 година.
Извештајот е насловен „Човечка кланица: Масовни бесења и истребувања во затворот Саједнај“. Невладината огранизација собрала сведочења од 84 очевидци, меѓу кои има чувари, поранешни осуденици и еден судија.
Amnesty International ги обвинува властите во Сирија за спроведување „политика на истребување“ и тврди дека егзекуциите биле одобрени на највисоко ниво на сириската влада.
Според Amnesty International во затворот имало пред се цивили, граѓани кои оделе на демонстрации, новинари, борци за човекови права, накусо – противници на режимот на Башар ел-Асад.
Еднаш неделно од ќелиите на затворот биле изведувани 20 до 50 лица и потоа, без да им се каже било што, биле бесени во текот на ноќта. Некои луѓе умирале веднаш а некои, особено помладите кои имаат помала тежина, биле влечени надолу за да им се скрши вратот.
Во текот на оваа акција очите на затворениците биле врзани. “Тие не знаат кога и како ќе умрат се додека јажето не им се стави на вратот”, известува Amnesty International.
Amnesty International тврди дека ова злосторство продолжува и денес. Затворот се наоѓа на 30 километри од Дамас.
“Хоророт опишан во овој извештај открива тајна и монструозна кампања, одобрена на највисоко ниво во владата, која има за цел да спречи било каков протест кај сириското население”, коментира Лин Малуф, заменик директорка за истражување во бирото на Amnesty International во Бејрут.
Во Сирија од почетокот на војната загинале околу 310.000 луѓе.