Швеѓанката Ана Бјерде е новата потпретседатлка на Светска банка за Европа и Централна Азија. Таа ќе ги предводи стратешките, аналитички, оперативни и истражувачки активности во регионот. Во текот на нејзината 25 годишна кариера била на повеќе високи функции во Светска банка, признат лидер е во областа на економскиот развој, со фокус на инклузивен раст и одржлив развој. Доаѓа на местото на Сирил Мулер, кој беше потпретседател за регионот на Европа и Централна Азија од јули во 2015 година.
Бјерде, се вели во соопштението од канцеларијата на Светската банка во земјава, го презема водството на регионот на Европа и Централна Азија во период на исклучителни предизвици за земјите клиенти на Банката. Многу земји се соочуваат со сериозни здравствени, социјални и економски последици како резултат на пандемијата од ковид-19.
Во услови на континуирана неизвесност, додаваат од Светската банка, најновото економско ажурирање на Светска банка во Европа и Централна Азија предвидува различни сценарија за негативен раст за регионот, вклучително и голема рецесија во 2020 година, со раст кој се движи помеѓу -4,4 и – 2,8 проценти,
„Како потпретседателка за Европа и Централна Азија, ќе соработувам со владите во земјите клиенти за да им помогнам во постигнување на силни развојни резултати, но нашиот сегашен фокус е насочен кон решавање на последиците од КОВИД -19 пандемијата врз здравството и економијата“, вели Бјерде.
Светската банка досега обезбеди повеќе од 1,4 милијарди долари за помош на земјите во Европа и Централна Азија да ги ублажат последиците од ковид-19. Од 2 април оваа година беа одобрени околу 490 милиони долари преку нови проекти за итен одговор. Покрај тоа, 925 милиони долари се распределуваат, користат или се ставаат на располагање од постојните проекти и заеми, вклучително и дополнително финансирање, за да им се помогне на земјите да одговорат на ковид-19.
Од Светската банка најавуваат дека во следните 15 месеци ќе распоредат до 160 милијарди долари финансиска поддршка за да им помогнеме на земјите да ги заштитат сиромашните и ранливите, да ги поддржат бизнисите и да го поттикнат економското закрепнување, вклучувајќи и 50 милијарди долари нови ресурси на ИДА во вид на грантови или заеми со многу поволни услови.