Советот на јавни обвинители вчера одржал седница на која ја разгледувал претставката на в.д. претседателката на Кривичниот суд во оставка Татјана Михајлова и донел заклучок дека двете обвинителки од Специјалното јавно обвинителство Катица Јанева и Фатиме Фетаи го прекршиле етичкиот кодекс. Ова денеска го изјави претседателот на Советот на јавни обвинители Петар Аневски, кој исто така ги информираше новинарите дека денешната седница на Советот е одложена.
„Двете обвинителки го прекршиле кодексот и наша препорака до нив е да се назначи нов јавен обвинител во конкретниот случај, изјави Аневски.
На последното рочиште за овој предмет што се одржа на 22 минатиот месец и двете обвинителки влегоа во жестока расправа со судијката во оставка Татјана Михајлова, по што таа двете ги казни по 2.000 евра за непочитување на судот.
Следното рочиште за овој случај е на 10 март.
Во овој случај обвинети се 14 лица, од кои пет лица како поттикнувачи, а останатите како директни извршители на насилството. Првообвинет е Никола Груевски, а обвинети се и ексминистерот Миле Јанакиески и поранешната советничка во Општина Центар, Даниела Рангелова.
Според обвинението, Груевски во случајот кој беше обелоденет во една од „бомбите“, е нарачател на насилството, а Јанакиески прифатил преку партиски членови да го спроведе насилството врз градоначалникот на Центар, Андреј Жерновски и членовите на општинскиот совет.