Бројот на мигрантите што пристигнуваат во Грција и Италија расте, но бројот на мигранти што побарале азил во ЕУ во 2017 година бележи голем пад од 44 отсто. Истовремено, европската дебата за мигрантската политика влегува во жешки води и се заканува дури да ја урне германската влада.
По една недела полемика и остри размени на изјави помеѓу канцеларката Ангела Меркел и нејзиниот конзервативен министер за внатрешни работи Хорст Сихофер, од баварската ЦСУ, постои вистински ризик за распад на кревката коалиција во Берлин која дојде на власт пред одвај 3 месеци.
Невозможната мисија на Меркел?
Меркел тргнува во тешка, за некои невозможна мисија – како да се најде решение што ќе ги задоволи и баварската членка на нејзината коалиција и Италија и Грција кои бараат правична поделба на мигрантите во сите земји членки. Во оваа дебата својот твитерски збор мораше да го каже и американскиот претседател Доналд Трамп долевајќи масло во огнот.
Сихофер предупреди дека е подготвен веднаш, уште во јули, да ги затвори германските граници за мигрантите што доаѓаат од друга европска земја доколки канцеларката не најде “слично” европско решение на самитот на ЕУ на 28 и 29 јуни.
– Јас сум решен ова да го применам ако европските преговори не успеат, изјави министерот.
ЦСУ се подготвува за тешки регионални избори во Баварска во октомври во кои ќе се бори со екстремната десница на Алтернатива за Германија па оттука нервозата на Сихофер. Нервоза која може да ја растури коалицијата за ЦДУ на Меркел. Сојузот помеѓу овие две партии датира во 1949 година.
Меркел значи доби рок од две недели, до самитот на ЕУ. Таа смета дека судбината Европа е во прашање поради мигрантската политика и нејзина цел е да се избегне “домино ефект” кој би бил фатален.
Нејзините двајца први соговорници во ЕУ, во обид да се најде решение, се Италија и Франција. И може да се каже дека доби поддршка од новиот премиер Ѓузепе Конте кој вчера беше во Берлин и повика на повеќе солидарност во ЕУ и подобра контрола на границите.
Таа вети дека ќе стори се за да најде европско решение но го отфрли ултиматумот на Сихофер уверувајќи дека нема да има “автоматско” затворање на границите за азилантите дури и ако нејзините напори во ЕУ не успеат.
– Не сакаме да реагираме унилатерално, без договор и начин кој може да им нанесе штета на сите, изјави таа.
Меркел изјави дека проблемот со мигрантите мора да почне да се решава со Северна Африка и особено Либија и поради тоа треба соработка со Агенцијата за бегалци на Обединетите Нации УНХЦР.
Денес Германија и Франција во Берлин одржуваат заеднички состанок на нивните две влади на кој главна тема ќе биде – мигрантската политика.
Трамп фрла масло врз огнот
Новиот твит на Трамп внесува раздор во ЕУ. Американецот со својот твит му даде поддршка на Сихофер. Тој напиша дека “германскиот народ се врти против своето раководство” во мигранската политика и додаде дека “криминалот на Германија е во голем пораст”.
Статистиките го велат токму спротивното – бројот на претсапи во Германија во 2017 година не бил толку низок а ваква ниска бројка е забележана во 1992 година.
Како што вели Дојче Веле “ова едноставно е лага, но тоа е составен дел од секој просечен Трамп-твит”. Текстот на Дојче Веле вооопшто не е нежен кон Трамп а во него пишува дека “овој американски претседател веќе нема сојузници, особено не во Берлин”.
Со ова тврдење на Дојче Веле се сложуваат и многу еропски медиуми денес и ги анализираат сите лаги на Трамп во однос на Германија и Европа.
Западниот Балкан на мигрантската агенда на ЕУ
Поради оваа комплексна европска ситуација со мигрантите, денешната средба на министрите за внатрешни работи на шесте земји од Западен Балкан со претставници на австриското и бугарското претседателство со Унијата може да биде важна.
Според најавите на министерски состанок ќе се разговара за миграциските предизвици на ЕУ.
Како што јави дописничката на МИА во Брисел, се очекува на средбата да се разгледува и предлогот за отворање кампови за бегалците во земјите од регионот на Западен Балкан.
Што велат ЕУ статистиките
Во првите пет месеци од оваа година во Италија пристигнале 13.450 мигратни, што претставува раст за 77 отсто на годишно ниво, во Грција над 19.800 мигранти а в Шпанија – 8.200, што е за 59 проценти повеќе во однос на периодот јануари-мај 2017 година.
Според податоците на Европската агенција за контрола на гранциите – Фронтекс, ваквата бројка на пристигнати мигранти во Грција претствува пораст за 90 отсто во споредба со истиот период лани.
Идејата на Меркел на и на Европската комисија, е да им се помогне на овие земји со тоа што другите членки на ЕУ ќе покажат солидарност и ќе земат кај себе одреден број од овие лица што бегаат од војна.
Најголемиот број од лицата кои лани побарале азил во некоја земја членка на ЕУ потекнуваат од Сирија, Иран или Авганистан.
Најмногу барање за азил биле поднесени во Германија, а потоа следуваат Италија, Франција, Грција, Велика Британија и Шпанија.