Се зависи од нас, порача селекторот Игор Ангеловски при објавата на списокот на фудбалери за последните два меча во групната фаза во Лига на нации против Лихтенштајн на 16 ноември во Вадуц и против Гибралтар на 19 ноември во Скопје. Меѓу повиканите и две нови лица за разлика од претходно. Од триото голмани излезе Давид Митов Нилсон од Норчепинг чие место овојпат му припадна на Дејан Илиев од Арсенал, а во петорката напаѓачи е вклучен Крсте Велкоски од тимот на Сараево.
„Судбината е во наши раце. Први сме во групата, имаме три бода предност во однос на најблискиот ривал, фаворити сме и очекуваме да се потврдиме како такви. Поразот во Ереван нема да дозволиме да се одрази врз атмосферата во репрезентацијата што ја градиме веќе трета година. Сплотени сме како ретко кога досега. Продолжуваме натаму кон крајната цел – прво место во групата и пласман во плејофот за Европското првенство во 2020 година“, порача Ангеловски на денешниот брифинг со новинарите.
На списокот за претстојните средби се вклучени и Езџан Алиоски од Лидс јунајтед и Елис Елмас од Фенербахче, но двајцата ќе немаат право на настап против Лихтенштајн во Вадуц. Ангеловски може да смета на нивните услуги за натпреварот со Гибралтар на арената „Филип Втори“. Во последен момент од неговите планови излегол Бесарт Ибраими кој останува во предвид кај селекторот за наредните кампањи на националниот тим, откако голгетерот на Шкендија ќе се рехабилитира од повредата.
Македонија е првопласирана во групата 4 во Д лигата на нации со девет бода, три повеќе од Ерменија и Гибралтар на втората, односно, третата позиција. Лихтенштајн е фенерџијата во конкуренцијата со три освоени бода од четири меча. Најдобрите селекции од четирите групи ќе формираат две полуфинални двојки, а победниците од нив ќе играат во финале за место на Европското првенство во 2020 година. Плејоф пресметките во Лига на нации е закажан за јуни во 2019 година.
Повикани фудбалери во репрезентацијата на Македонија за дуелите со Лихтенштајн и Гибралтар во Лига на нации
Голмани
Столе Димитриевски (Рајо Валјекано/Шпанија)
Дамјан Шишковски (Лахти/Финска)
Дејан Илиев (Арснеал/Англија)
Одбрана
Висар Муслиу (Шкендија)
Егзон Бејтулаи (Шкендија)
Кире Ристевски (Ујпешт/Унгарија)
Кристијан Тошевски (Вардар)
Ѓоко Зајков (Шарлроа/Белгија)
Среден ред
Аријан Адеми (Динамо Загреб/Хрватска)
Енис Барди (Леванте/Шпанија)
Стефан Спировски (Ференцварош/Унгарија)
Бобан Николов (Види МОЛ/ Унгарија)
Езџан Алиоски (Лидс јунајтед/Англија)
Ферхан Хасани (Ал Раед/С. Арабија)
Елиф Елмас (Фенербахче/Турција)
Напад
Горан Пандев (Џенова/Италија)
Илија Несторовски (Палермо/Италија)
Александар Трајковски (Палермо/Италија)
Иван Тричковски (АЕК Ларнака/Кипар)
Крсте Велковски (Сараево/БиХ)