Специјалното јавно обвинителство потврди за НОВА ТВ дека побарало документација од Државната комисија за спречување корупција (ДКСК) како дел од финансиските истраги за одредени лица, за периодот од 2008 до 2015 година.
Имено, барањето до Антикорупциска за кое СЈО нема одговор, го доставиле на 24.април годинава, а на истиот ден Антикорупциската побара од Државниот архив да им одобри уништување на документација во растојание од 2002 до 2014 година.
– Ве известуваме дека во рамки на финансиските истраги што ги спроведува ова Јавно обвинителство до Државната комисија за спречување на корупцијата поднесени се барања за доставување на анкетните листови кои ги поднеле лицата за кои се водат финансиските истраги, потоа изјавите за судири на интереси, како и податоци за евентуално преземени активности на Комисијата и сите акти кои произлегуваат од преземените активности. Бараните податоци се однесуваа за периодот од 2008 година до 2015 година, се вели во одговорот на СЈО испратен до НОВА.
Оттаму потенцираат дека недоставувањето на бараната документација и нејзиното евентуално уништување би можело да има влијание на предистражните постапки со оглед дека ќе биде оневозможена проверката на имотната состојба која лицата за кои се спроведуваат финансиските истраги ја прикажале пред Комисијата во споредба со доказите кои СЈО ги прибавува од различни институции.
НОВАТВ „нападната“ од реакции од Антикорупциската
По вчерашната објава на НОВА ТВ за уништувањето на документацијата, Антикорупциска испрати Демант со барање за исправка, но наместо прецизирање за тоа кој дел од пишаното не е точен, НОВА ТВ доби предупредувања дека не работи според новинарските стандарди.
„…Станува збор за рутинско редовно работење на Генералниот секретаријат на Државната комисија за спречување на корупцијата согласно законските обврски и одредби според Законот за архивски материјал (“Сл.весник на РМ” бр.95/2012. 41/2014, 72/2015, 148/2015 и 169/2015), Уредбата за канцелариско и архивско работењс (..Сл. весник на РМ” бр.1/2014) и Упатството за начинот и техниката на постапување со архивскиот и документарниот материјал во канцелариското и архивското работење (..Сл. весник на РМ” бр.99/2014), што согласно со член 16 од наведениот закон се однесува на сите државни органи, институции, јавни установи и служби и останати наведени во одредбата“, се вели во демантот со барање за исправка од ДКСК.
Некаде околку 23 часот, добивме реакција и од Државниот архив во која се вели:
„Пред донесување на Решението, стручно лице-советник за евиденција, заштита и стручен надзор на архивскиот материјал кај имателите при Државниот архив на Република Македонија изврши увид во предложениот попис на документарниот материјал за уништување и е константирано дека предложениот документарен материјал е со изминат рок на користење и во него нема архивски материјал“, потенцирајќи дека се испочитувани законските одредби при постапувањето.
Помеѓу двете реакции, НОВА ТВ испрати дополнителни прашања до Антикорупциска со цел да ни посочат што треба да се промени во текстот, но утрово околу 10 часот добивме нов демант и тоа доставен лично на рака каде наместо одговори на прашањата, добивме речиси и закани за тужби и глоби.
„Глоба во износ од 1.500 до 3.000 евра во денарска противвредност ќе му се изрече за прекршок на правното лице ако: не изврши објава на исправка согласно со членот 18 и 19 од овој закон (Законот за медиуми)“, се вели во вториот демант.
Но и понатаму, во име на вистината и расчистување на нејаснотиите, остануваат отворени прашањата кои Антикорупциска не ги одговори.
НОВА ТВ побара листа од документацијата и дали му одговориле на СЈО, но во демантите од Комисијата се вели дека „станува збор за рутинско редовно работење“.
Со цел транспарентност кон јавноста, во прилог ги доставуваме сите прашања за кои НОВА ТВ побара одговор од ДКСК, но до објавувањето на овој текст, нема ниту еден одговор.
Прашањата кои НОВА ТВ ги испрати до Антикорупциската комисија во три наврати интегрално
- Може ли да ни кажете како се прави селекцијата на списи кои треба да се уништат?
Веќе еднаш побаравме од Вашите вработени да контактираме со претседателот на Комисијата или со неговиот портпарол/ка на лице место легитимирајќи се, но одговорите наместо од Вас ги добивме од службите на врата.
- Како и да е можете ли да ни ја доставите листата со попис која сте ја доставиле до Државниот архив за уништување?
- Можете ли да ни одговорите дали на Специјалното јавно обвинителство ќе му ги доставите досиејата кои тие од Вас ги барале и дали сте се погрижиле списите пратени на уништување да не се содржат и досиеја кои им се потребни на СЈО?
- Зошто Антикорупциската комисија одлучила да носи одлука за ништење на документација на 24.април 2017 година, односно во истиот ден кога и Специјалното јавно обвинителство се обратило до Антикорупциската комисија со барање за доставување документација од 2008 до 2015?
- При носењето на оваа одлука, дали ги имавте во предвид и правните последици од кривична природа кои ги произведуваат Вашите одлуки, во случај помеѓу таа документација да се и документи витални за истрагите на СЈО?
- По демантите, односно Вашите барања за исправка на текстот објавен на НОВА ТВ под наслов „Антикорупциска со дозвола од Архивот уништува документација“, и нашите прашања на кои досега не доставивте ниту еден одговор, а со цел расчистување на нејаснотиите, до Вас доставуваме уште едно дополнително прашање кое гласи:
Дали во документацијата испратена на уништување, за што имате согласност и од Државниот архив, има било каква документација поврзана со предметите кои ги водевте за имотот на Никола Груевски или фирмите во Прага на господинот Сашо Мијалков а кои беа во Ваша надлежност?
Согласно духот на мисијата на Антикорупциската комисија – инсистирање на транспарентност и отчетност од избраните и именувани функционери во име на граѓаните, очекуваме претставниците на комисијата да постапат согласно своите преземени обврски пред Законот и да ги одговарат овие прашања пред јавноста.
