Специјалното јавно обвинителство бара документи, а Антокорупциската комисија ги уништува. НОВА ТВ дознава дека СЈО од Државната комисија за спречување корупција побарало имотни листови, информации за судир на интереси и предмети за функционери, но наместо да ги достават во СЈО, вработени во комисијата денеска документите ги товареа во возила и ги носеа на уништување.
Денеска НОВА беше сведок како вработени во Антокорупциската комисија изнесуваат папки со документи и ги товарат во две возила, сопственост на Државниот архив.
Екипата на НОВАТВ ги забележа досиејата од големите корупциски случаи кои што никогаш не добија завршница како на пример „Топилница – Велес“ и Случајот со злоупотреба на службената должност од страна на директорот на Јавното претпријатије „Македонски шуми“, Жарко Караџоски.
Решението за уништување на архивскиот материјал од 2002 до 2014 година, Државната комисијата за спречување на корупцијата го донела на 27.април годинава, само еден ден откако СЈО ги побарало документите.
Државниот архив ја примил листата со попис на документите за уништување и дал дозвола за да се уништат.
Ова го пишува во документот за уништувањето на документацијата, а до којшто дојде НОВА ТВ додека се изнесуваа материјалите од Комисијата.
Со докумети се наполнија два автомобили, а по пристигнувањето на екипата на НОВАТВ престанаа да се товарат документи во автомобилите по што дојде возило на компанијата ДС Смит која се занимава со производство на хартија и амбалажа и истата ја презеде, за како што рекоа оттаму, на уништување.
