Ректорот на Универзитетот „Свети Кирил и Методиј“ Никола Јанкуловски спротивно на законите земал плата и од Ректоратот и од Клиниката за дигестивна хирургија каде е професор и хирург – утврди Антикорупциската комисија.
Јанкуловски кој е избран за ректор во 2016 година, не го ставил во мирување своето работно место на Клиниката за дигестивна хирургија иако тоа морал да го стори според Законот за работни односи и Законот за здравствена заштита. Во овие два закони, пишува дека „доколку вработено лице биде именувано на друга функција, своето работно место да го стави во мирување“ рече Салаи Шемши – член на Антикорупциската комисија кој го водеше предметот по анонимна пријава.
Во одговорот што го добиле од клиниката и од ректоратот пишувало дека според Законот за високо образование ректорот се избира од редот на професорите, а според Законот за здравствена заштита тој не може да биде професор ако не ја врши дејноста и дека затоа работното место не е во мирување и дека тоа е направено во време кога е именуван и важел стариот Закон за високо образование.
Јанкуловски од Клиниката земал плата, а од Ректоратот „месечен надоместок“. Салаи Шемши наведе и дека Универзитетот немал правилник за висината на надоместокот, но рече дека надоместокот кој му бил исплатуван на Јанкуловски бил во висина на плата.
Тие бараат Обвинителството да поведе кривична пријава против ректорот „за стекнување на материјална корист спротивна на законите“ и против директорот на Клиниката за дигестивна хирургија Жарко Караџоски за злоупотреба на службената положба.
Јанкуловски исто така ќе треба да ја стави во мирување својата работа како доктор односно професор и плата да зема само од Ректоратот. Тој има право 70 проценти од своето работно време да го посвети на ректорската функција, а 30 проценти – на професорската, но незаконски е да зема две плати, затоа што не ги извршува двете функции со полно работно време.
Антикорупциска побара Министерот за образование да ги суспендира одлуките на Интрауниверзитетската конференција
Антикорупциската комисија на днеешната седница по анонимна пријава го разгледуваше и изборот на Интрауниверзитетската конференција на УКИМ и побара од Министерот за образование да ги суспендира сите одлуки донесени од оваа конференција како и да ги поништи одлуките за избор на членови во Националниот совет за високотo образование, одборот за акредитација и одборот за евалуација.
Антикорупционерите побараа да се повтори и изборот на членови на Интрауниверзитетската конференција која била конституирана без претседателите на студентските собранија, актите за работа биле донесени со задоцнување од две години, не била исполнета обврската за јавност и транспаретност, не била изготвена веб страница и огласот за членови на одборот за евалуација и акредитација не биле објавени согласно закон.