Антикорупциската комисија оди до крај со битката со парцелата на паркингот спроти Холидеј ин. Државната комисија за спречување корупција под лупа ќе ја стави издадената градежна дозвола, со која на местото се предвидува да „никнат“ повеќекатници. Проверката на антикорупционерите следи откако вчера градоначалникот на Општина Центар, Саша Богдановиќ, изјави дека повеќе не постојат правни пречки за инвестироте „МГ Фешн“ и Македонската православна црква да почнат да ги градат зградите. Шефицата на Антикорупциска, Билјана Ивановска веќе ја побарала документацијата од општината.
– Ние денеска испративме писмо до Општина Центар со кое бараме да нѝ се достави градежна дозвола и осноен проект со цел да ги утврдиме сите детали поврзани околу дозолата, па ќе видиме понатаму дали ќе може нешто плус да се прави од наша страна или не, вели претседателката на Државната комисија за спречување корпуција во изјава за Канал 5.
Претходно, Општина Центар до Министерството за транспорт и врски понднесе елаборати за суспензија, со цел да добие мислење од Министерството за тоа како да постапи со спорните урбанистички планови изгласани во 2012 година. Министерството формираше Комисија за ова прашање, која утврди дека Општина Центар доставила до нив погрешни елаборати за суспензија кои не се изготвени согласно одредбите на Законот за урбанистичко планирање, а во нив немало ниту конкретни податоци со кои се докажува штетата врз јавниот интерес.
По ставот на Комисија, Општина Центар донесе одлука со која не ги суспендира спорните Детални урбанистички планови, а со тоа отвори пат на инвеститорите да ги изградат висококатниците и покрај бурните реакции во јавноста. Тие планираат на самиот паркинг да изградат три висококатници.
Паралелно, Обвинителството за гонење на организиран криминал и корупција води предистражна постапка, од која не споделуваат детали повикувајќи се на тајност на постапката. Сепак, велат дека постапува надлежен јавен обвинител кој ги разгледува аспекти поврзани со случајот.