Државната комисија за спречување на корупцијата (ДКСК) го добила договорот со американско-турскиот конзорциум „Бехтел и Енка“ што го побара како дел од документацијата за предметот што го отвори во однос на проектот за изградба на коридорите 8 и 10д по објавите во медиумите околу изборот на фирмата за надзор. ДКСК веќе формирала и тим од четворица советници за анализа на предметот.
„Го побаравме договорот, го добивме и работиме на сите документи, што значи сега анализата е во тек“, изјави денеска претседателката на Комисијата Билјана Ивановска.
Ивановска рече дека не може да каже рокови, но нагласи дека тој предмет „им тежи најмногу“ и оти со сите сили се вложени за да се сработи побрзо.
„Тимот е составен од четворица советници. Секој е специјалист во својата област. На пример, некој во јавни набавки повеќе, некој во делот за вработувањата“, рече Ивановска. Таа дополни дека вклучиле и „истражувач“.
Поради важноста на случајот во неговата анализа се вклучила и самата Ивановска. Инаку пракса е во Комисијата секој случај да се доделува на член на Комисијата кој сам го анализира и подготвува заклучоци.
„Не можам да кажам прецизни рокови кога ќе бидеме готови“, вели претседателката на Државната комисија за спречување на корупцијата.
„Тој предмет највеќе од сите ни тежи, така што сите сили се вложени за да биде што побрзо“, изјави Ивановска, која учествуваше на предавање за борба против корупцијата во учлиштетот „Коле Неделковски“ во скопската општина Центар.