И по вториот круг на гласањето во Обединетите Нации (ОН) поранешниот португалски премиер Антонио Гутерез и понатаму е фаворит за иден генерален секретар на оваа организација.
Во вториот круг тој доби “охрабрување” од 11 земји членки од вкупно 15, од 2 земји доби “обесхрабрување” а 2 земји беа “без оценка”.
Овој начин на тајно гласање е организирано во Советот за безбедност. Секој од 15те амбасадори на Советот треба да го оцени секој кандидатите со една од трите забелешки “охрабрува”, “обесхрабрува” и “без оценка”.
Гутерез, кој беше премиер на Португалија од 1995 до 2002 година а потоа Висок комесар за бегалци во ОН до 2015 година, остави одличен впечаток повторно.
Изненадување приреди српскиот поранешен министер за надворешни работи Вук Јеремиќ кој доби 8 позитивни гласа и кој сега е на второ место. По него, исто така како изненадување, на трето место е Сузана Малкора, министерка за надворешни работи на Аргентина.
Поранешниот словенечки претседател Данило Турк, кој по првиот круг беше на второ место, овој пат е на четврто место.
По него е Бугарката Ирина Бокова, актуелен генерален секретар на УНЕСКО.
Дури потоа доаѓаат Срѓан Керим, поранешната премиерка на Нов Зеланд Хелен Кларк и Кристијана Фигерес, поранешен преговарач за клима на ОН.
На дното на листата се Молдавката Наталиа Герман, екс министерка за надворешни работи, шефот на словачката дипломатија Мирослав Лајчак и Игор Лукшиќ, екс премиер на Црна Гора.
Во текот на овој втор круг 15те членки на Советот за безбедност дадоа повеќе негативни гласови во надеж дека повеќе кандидат кои добиле малку “охбрабрувачки” гласови сами ќе се откажат од трката.
Тоа го направи Весна Пусиќ, екс министерка за надворешни работи на Хрватска, која оцени дека нема никакви шанси да застане на чело на ОН и покрај тоа што организацијата би сакала на чело да стави жена, по можност од југо-источна Европа.
Дипломатите тврдат дека селекцијата ќе се одвива до октомври а западните земји ќе треба да преговараат со Русија, која инсистира новиот генсек на ОН да дојде од источна Европа, ако сакаат Португалецот да стане прв човек на ОН.
И покрај тоа што гласањето е тајно, според агенцијата АФП, повеќе дипломати веруваат дека “обесхрабрувањето” за Гутерез дошло од Русија.
Конечно, одлуката ќе ја донесат петте големи земји и постојани членки на Советот за безбедност (САД, Обединетото кралство, Кина, Франција и Русија) кои имаат право на вето дури и за најдобро пласираниот кандидат.
Финалниот избор ќе биде проследен до Генералното собрание на ОН во септември или октомври.
Мандатот на актуелниот генерален секретат Бан Ки-мун завршува на крајот на оваа година.