Судскиот совет на денешната седница ја назначи судијката Лидија Димчевска за в.д. претседател на Апелациониот суд Скопје.
Денеска Советот требаше да избира претседател на второстепениот суд, бидејќи актуелната претседателка Лилјана Шопова заминува во пензија. Но изборот изостана и наместо тоа се назначи вршител на должност, откако мнозинството од членовите на Советот се согласија да се изврши вонредно оценување на кандидатите, затоа што последен пат биле оценувани во 2016 година.
Инаку, Димчевска која ќе раководи со скопска Апелација, каде веќе работи како судија во граѓански предмети и е претседател на совет.
Како што може да се види од нејзината биографија на веб-страницата на судот, таа за апелационен судија е избарана кон средината на декември 2001 година.
Првпат била избрана за судија во Општинскиот суд во Куманово во далечната 1986 година, каде работела на граѓански, оставински и вонпарнични предмети.
Димчевска беше актуелна во јавноста откако во 2014 година ја потврди првостепената пресуда на Основниот суд Скопје 2 донесена една година претходно, со која тогашниот претседател на НСДП, Тито Петковски беше осуден за навреда и клевета на тогашниот премиер и лидер на ВМРО-ДПМНЕ, Никола Груевски и беше задолжен да му исплати отштета од 12.000 евра.
Груевски го тужеше Петковски затоа што во 2012 година за неделникот „Фокус“ претседателот на НСДП изјавил дека Груевски со официјално писмо до генералниот секретар на Обединетите нации предложил новото име на државата да биде Република Македонија (Скопје).
Димчевска, заедно со судиите Станка Зафировска и Енвер Беџети одлучуваше и ја потврди пресудата против новинарите Јадранка Костова и Владо Апостолов.
Новинарите беа тужени од поранешниот директор на Управата за безбедност и контраразузнавање, Сашо Мијалков поради два текста, објавени во неделникот „Фокус“.