Денеска во Апелацискиот суд ќе се разгледува жалбата на екс премиерот Никола Груевски за двегодишната казна затвор, донесена од Основен суд Скопје 1.

Тој е осуден во случајот на СЈО, „Тенк“, за купување автомобил „Мерцедес“ во вредност од 580 илјади евра.

Груевски како поттикнувач за извршување на делото е осуден на две години затвор, а поранешниот помошник министер во МВР Ѓоко Поповски на шест години и шест месеци затвор.

Груевски вчера на прес конференција рече дека ниту тој ниту неговите адвокати нема да дојдат на денешната јавна седница на Апелација и обвини дека судовите носат одлуки под политички притисок и дека судот веќе решил да му одреди казна затвор.

Груевски очекува одлуката на судот да биде казна затвор помалку од една година, за тој да нема право на жалба во Врховен суд.

Во петокот, седницата траеше 10 часа. Одбраната на Груевски бараше за изземање на судечкиот совет, претседателот на Апекацискиот суд, судијата известител и претседателот на судечкиот совет од страна на адвокатот Стерјо Зиков и осудениот Никола Груевски. Сите барања беа одбиени.

Таа беше прекината откако судијата известител ја прочита првостепената пресуда, претседателката на судечкиот совет Цветанка Пешиќ ја прекина седницата и продолжението го закажа за денеска, 5 септември.