По состанокот во Ријад, 12 држави од арапскиот и исламскиот свет упатија заеднички повик до Иран за итно запирање на нападите во регионот.
Во заедничката изјава, објавена по министерскиот состанок, земјите остро ги осудија иранските напади со балистички ракети и беспилотни летала, наведувајќи дека тие се насочени не само кон воени цели, туку и кон цивилна инфраструктура, вклучително аеродроми, енергетски капацитети и дипломатски објекти.
Министрите нагласија дека ваквите дејствија претставуваат кршење на меѓународното право и не можат да бидат оправдани под никакви околности.
Дополнително, беше истакнато правото на државите да се бранат согласно Повелбата на Обединетите нации, како и потребата од почитување на принципите на суверенитет и немешање во внатрешните работи.
Во изјавата се повикува и на итно спроведување на релевантните резолуции на Советот за безбедност на ОН, како и на прекин на поддршката за вооружени групи во регионот.
Земјите потписнички, меѓу кои се и Катар, Саудиска Арабија, Турција, Египет, Јордан и Пакистан, најавија продолжување на координацијата со цел стабилизација на регионот и спречување на понатамошна ескалација.