Тетовската градоначалничка Теута Арифи денеска беше во посета на пожарникарите кои интервенираа пред два дена, со цел да се информира детално за пожарот и интервенцијата на единицата во модуларната болница на 8 септември. Пожарот, како што рече Арифи, бил локализиран во 21:30 часот, а целосно е изгаснат по 15 минути. Таа додаде дека во диспечерката служба ТППЕ Тетово во 21 часот и 02 минути е примен повикот за пожар од инфективното одделение, а на местото на настанот веќе во 21 часот и 07 минути биле присутни три возила и 16 пожарникари.
На новинарско прашање дали како прв човек на градот ќе бара морална одговорност од раководството на болницата, Теута Арифи рече дека прво сака да добие одговори на неколку прашања.
-Треба да се има предвид фактот дека ова беше голема несреќа и во голема несреќа не сите работи можете одма на почетокот да ги канализирате. Знаете и вие какво беше известувањето вечерта. Тоа што е важно-нека заврши процесот на истрагата и да имаме тука неколку одговори кои сите го очекуваме. Да ги добиеме сите тие одговори, одговорноста не е само морална и како таква треба да се понесе, истакна градоначалничката.
Арифи рече дека завршени се истрагите на место на настанот и во моментот се прибираат податоците, телефонските снимки од граѓаните кои биле на местото.
-Вклучувањето на истражители од Германија е додатна помош овој процес да биде завршен, заклучи Арифи.