„Никогаш немало барање, пратено агреман ниту имало предлог за поранешната градоначалничка на Тетово Теута Арифи да биде амбасадор на Македонија во Анкара и Вашингтон. Имало размислување за Брисел но немало формализиран предлог“, изјави министерот за надворешни работи Бујар Османи на денешната прес конференција.
Османи не е сигурен дека во јуни, Македонија ќе добие датум за преговори за влез во Европската Унија. Според него, направено е се што се барало, а доколку датумот не биде доделен, тогаш, за одговорноста кажа дека е во Бугарија и ЕУ. Османи кажа дека ќе опадне и заинтересираноста на граѓаните за овој процес, со тоа Македонија ќе треба да се посвети на внатрешните проблеми.
За посетата на еврокомесарот Оливер Вархеји, рече дека била во насока да се надминат разликите меѓу Македонија и Бугарија.
„Со Вархеји се разменуваа идеи како да се надминат разликите во однос на содржината на преговарачката рамка, тој е претставник на Комисијата која ја предлага преговарачката рамка. Не можам да кажам што се размислувањата, но добро е што комесарот се движи во Скопје и Софија“, кажа Османи.
Во однос на тоа што бугарската авиокомпанија Гуливер прекина да продава карти за летот од Софија до Скопје од 21 мај, Османи рече дека одговорноста ја презела Бугарија.
„Првата фаза беше обид, ова запирање е процес на преговори помегу компанијата и Бугарија“, посочи министерот Османи.
Министерот за надворешни работи на Литванија, Габриелиус Линдсбергис, на заедничката прес конференција со Османи, порача дека почетокот на преговорите со ЕУ за Македонија и Албанија треба да започнат пред крајот на француското претседавање со Унијата.
„Сега е времето да се направи пробив, без дополнителни одлагања, меѓувладината конференција со Северна Македонија и со Албанија мора да се одржи пред крајот на француското претседателство со ЕУ. Се работи за кредибилитетот на ЕУ и одржување на ветувањата за политика на отворени врати дадени пред неколку децении“, рече Линдсбергис.