Министерството за здравство денеска информира дека примиле на разговор претставници на Асоцијацијата за цистична фиброза, пациенти со цистична фиброза и родители на деца со цистична фиброза. Соопштението беше објавено до јавноста, откако претходно пред Министерството претставници на Асоцијацијата, истакнаа дека се уште нема прогрес во однос на набавка на лекот „Трикафта“.
Како што информираше Министерството за здравство целта на дискусијата била запознавање со процесот во кој Министерството веќе активно работи на наоѓање решение за овие пациенти. За таа цел, нагласува Министерството, е ангажирана работна група која од пред две недели работи на случајот.
„Претставници од Асоцијацијата исто така ќе бидат повикани и на состанок со работната група за директно да бидат вклучени и запознаени со предизвиците и чекорите потребни за да се стигне до решение за оваа ранлива категорија“, се наведува во соопштението.
Денеска претходно прес-конференција одржаа претставници на Асоцијацијата, кои реагираа дека поминал еден месец од законските измени и сè уште нема никаков прогрес во однос на набавка на лекот „Трикафта“. Тие апелираа на поголема ажурност од страна на надлежните институции.
Од Асоцијацијата информираа дека воопшто не е воспоставен контакт со потребната компанија, а не се работи ниту на програмата за обезбедување на лекот за останатите пациенти и најавија протест доколку набавкатане се забрза.
Оттаму информираат дека има вкупно 140 лица заболени од цистична фиброза, но дека не може да се одреди колку лица се во критична состојба, затоа што параметрите се менуваат постојано.
Извор: МИА