Грчката влада одлучи да протера двајца руски дипломати и да забрани влез во Грција за уште двајца, обвинувајќи ги за мешање во внатрешните работи и незаконски дејства против националната безбедност на Грција, објавува весникот Катимерини, повикувајќи се на високи грчки дипломатски извори.
Поконкретно, Атина ги обвинува руските дипломати за обиди да извлечат и да објават информации и да поткупат грчки оперативци, кои според весникот завршиле неуспешно.
Во еден дел од текстот се истакнува дека имало напори Русија да интервенира во „чувствителното домашно прашање, како што е договорот меѓу Грција и БЈРМ околу името, и со тоа негативно влијае на улогата на Грција на Балканот“.
Катимерини коментира дека овој случај ја изнесе на површина напнатоста што што постои меѓу Атина и Москва во текот на последните две години, поради прашања поврзани со регионалната безбедност.
Според високите грчки дипломатски извори, Атина бара итно протерување на две лица, меѓу кои е претставникот на руската амбасада, Виктор Јаковлев и протерување на уште други двајца.
Весникот пишува дека овој чекор уследил по бројните координирани напори за проширување на руското влијание во Грција, меѓу другото и преку активностите на Империското православно палестинско општество.
Истите извори за весникот изјавуваат дека и покрај напорите на грчката Влада да одржи добри односи со Русија, во последно време разни кругови поврзани со руските интереси се мешаат во грчките домашни работи.
Тоа се прави преку финансиски „награди“ за општините, но и митрополитите во грчката православна хиерархија и да обезбедат влијание на Света Гора.
Грчките дипломатски извори за Катимерини велат дека одлуката за протерување е ограничена на конкретните четири лица и не ги менува пошироките добри намери на Грција кон Русија.
Тие додаваат дека сите “реципрочни чекори” на Москва ќе доведат до понатамошно влошување на односите. Во исто време тие укажуваат на фактот дека ниту еден член на грчките дипломатски и конзуларни служби во Русија не се однесувал надвор од строгата рамка на нивната мисија.
Во изјава за грчката ТВ Скај, портпаролот на грчката Влада Димитрис Ѕанакопулос, коментирајќи ги пишувањата на медиумите, рече дека Грција сака добри односи со сите земји, но сите земји се обврзани да го почитуваат меѓународното право и правото, Владата и државата. Во тој контекст тој рече дека преземени се неопходните мерки.