Грчката Влада ја продолжи мерката за привремено ограничување на сите авионски, железнички и патни врски со Северна Македонија и забрана за влез на македонски државјани на грчка територија до 15 мај.
Одлуката на министрите за здравство, за инфраструктура и транспорт и за поморство на Грција, што е во сила до 15 мај 2020 година во 15 часот и вчера беше објавена во „Службен весник“ е „од превентивни причини за заштита на јавното здравје од дополнително ширење на коронавирусот на грчка територија“.
Забраната за влез во Грција не се однесува на грчки државјани, на граѓани со дозвола за престој, како и за лица чие постојано живеалиште е во Грција. Исто така, исклучок од забраната има за камиони кои пренесуваат стока.
Во истата одлука на министрите, вклучени се и мерки што се однесуваат на поврзувањето на Грција со Албанија, со Италија и со Шпанија.
На 15 март, на состанокот на грчкиот премиер Кирјакос Мицотакис со министри од неговата Влада, беше донесена одлука Грција да ги затвори границите со Северна Македонија и Албанија, одлука што сега е продолжена за уште еден месец.