Пратениците на Социјалистичката партија Владанка Авировиќ и Љупчо Димовски на денешната собраниска седница не им се придружија на колегите од ВМРО-ДПМНЕ, кои ја напуштија седницата, на која владејачкото мнозинство немаше обезбедено кворум, за да започне седницата.

Авировиќ и Димовски останаа во пленарната сала и со тоа овозможија да се постигне потребниот кворум од 61 пратеник за почеток на седницата.

Од партијата на Љубисав Иванов Ѕинго, кои  се коалициски партнери на ВМРО ДПМНЕ, за НОВАТВ рекоа дека досега во партијата не било  разговарано за промена на курсот на дејствување. Дел од членовите на партијата, кои сакаа да останат анонимни велат дека потегот на Авировиќ и Димовски ги изненадил.

На телефонот на пратеничката Авировиќ се јавуваше нејзината секретарка која кажа дека пратеничката била на комисии и да ја побараме дури вечер.

Пратениците на оваа партија на почетокот на месецов не ја потпишаа и иницијативата на ВМРО-ДПМНЕ за гласање недоверба на Владата во Собранието. Авировиќ тогаш изјави дека е на боледување, а колегите Миланов и Димов имале рочишта.

Од ВМРО ДПМНЕ велат дека пратениците на Социјалистичката партија во своите настапи и говори во Собранието и  натаму ги застапуваат ставовите на опозицијата. Денешното однесување не сакаа да го коментираат.