Комесарот на ЕУ за миграција Димитрис Аврамопулос изјави дека не треба да бидат продолжени вонредните контроли на границите внатре во шенгенската зона, бидејќи бегалската криза поминува.

ЕУ претходно им дозволи на членките на Шенген, Австрија, Данска, Германија и Шведска, како и на Норвешка која не е во ЕУ, да воведат проверки на своите граници од безбедносни причини.

Аврамопулос рече дека проверките биле оправдани, но дека причините поради кои се воведени веќе не постојат.

-Верувам дека е време да се вратиме на нормалното функционирање на Шенген, рече еврокомесарот пред новинарите.

Аврамопулос оцени дека спогодбата на ЕУ и Турција за намалување на бројот на нелегални мигранти добро функционира и дека минатиот месец од Турција во Грција дошле 81 отсто помалку мигранти во однос на август лани.

-Во текот на изминатите две години работевме во кризен режим, сега е време да излеземе од кризата, изјави Аврамопулос.

Системските проверки се забранети внатре во Шенген зоната, во која се применува безвизниот режим на патување. Вонредните контроли меѓутоа се воведени во мај 2016 година, една година откако во Европа дојдоа околу милион мигранти, и од тогаш се двапати продолжувани.

Ова прашање стана една од главните теми на изборната кампања во Германија, а канцеларката Ангела Меркел се залага за продолжување на контролите и по 11 ноември, кога ситекува важноста на оваа мерка.