Дворачниот бекхенд што е задоволство да се гледа како го изведува Роже Федерер или убиствениот еднорачен форхенд на Рафаел Надал. Уметноста на швајцарскиот тенисер наспроти силата на шпанскиот. Големите ривали во машкиот тенис, од скоро и големи приатели, утре во 09,30 часот во 35 меѓусебен меч. Двата мајстора на „белиот спорт“ на сите времиња за кои е одвишен секој збор овојпат во битка за трофејот на Австралија опен.
Финале на гренслем турнир одамна не дигнало толку прав како претстојната класика. Федерер и Надал „тежат“ 31 титула. Tенисерот од Базел има 17, неговиот ривал од Мајорка 14 при настапите на репрезентативната „четворка“, вкупно гледано зад себе имаат 157 трофеи. Организаторите во Мелбурн парк можеа само да сонуваат за ваков дуел за титулата, спектакл што оди на задоволство на сите вљубеници во тениската игра.
Ваков епилог ретко кој можеше да очекува. И самите тие признаа дека не можеле да сонуваат меѓусебно финале на Отвореното тениско првенство на Австралија ниту фановите се надеваа по повредите поради кои предвреме ја завршија 2016 година.
„Ќе дадам максимум, па макар и да не можам да одам во наредните пет месеци“, рече Федерер.
Федерер и Надал ќе играат по 22 пат во финале на некој турнир. На гренслем настапите подобар е Шпанецот со шест победи во осум меча. Двете што завршија во корист на Швајцаецот беа на Вимблдон. Последната меѓусебна средба ја имаа во Базел во 2015 година и на општо задоволсто на домашната публика која отпоздрави победа на нивниот миленик.
Тениските асови траат повеќе од декада. Самото нивно ривалство е веќе 13 годишно од кога датира и првата средба во Мајами. Федерер беше доминантен при појавувањето на сцената на Надал кој подоцна ќе се претвори во најголем негов ривал. Едниот важеше и сè уште важи за специјалист на трева, другиот го доби прекарот „крал на земјата“. Швајцарецот едноставно беше недопирлив на Вимблдон, Шпанецот во Париз по што почнаа да се мешаат во сектор на другиот.
На годинашното издание играат како во зенит на кариерите, а не како да заоѓаат полека. Покажаа дека сè уште траат, дека немаат рок на употреба и дека сериозно треба да се смета на нив и покрај возраста. Колку постари, толку подобри како и виното. Можеби претпоставката дека сме последно финале меѓу тенисерите што ја одбележаа златната ера на светскиот тенис му даваат посебен тон на натпреварот.
Подлогата побрза, побрзи и топчиња кои и повеќе отскокнуваат
Во изминатите две недели колку што трае австралискиот гренслем можеше да се прочитаат ставови на голем број доброупатени лица во тенисот кои сметаат дека и организаторите на турнирот имаат заслуга што Федерер ќе игра финале. Го образложуваат тоа со менување на подлогата пред три месеци што ѝ дава пеколна брзина на играта. Со неа ги врзуваат и елиминациите на бранителите на титулите во машка и во женска конкуренција (Новак Ѓоковиќ и Анжелик Кербер) и на водечкиот на АТП листата Енди Мареј. За таквата нејзина карактеристика се согласува и самиот Федерер.
„Вакви подлоги се користеа на турор до, некаде, 2005 година. Потоа наеднаш беа забавени. Ние тогаш моравме да го менуваме начинот на игра. Некој успеа, некој не“, рече швајцарскиот тенисер.
Побавните подлоги беа воведени за разбивање на здодевноста на гледачите од сервис-волеј играта што овозможуваше конкурентност на технички и тактички послабите тенисери. Оттогаш почна и ерата на вистинските мајстори какви се Ѓоковиќ, Надал, Федерер и Мареј кои не се потпираат само на силината на ударите и сервисот. Оваа, во случајот, повеќе оди во прилог на Федерер.
Побрзи се и топчиња кои и повеќе отскокнуваат. Такви, како фактор, повеќе одговараат на леворакиот бомбардер од Шпанија кој сигурно ќе се обиде да тероризира и со познатите форхенд дијагонали.
Патот до финале на Австралија опен 2017 на Рафаел Надал
Прво коло: Флоријан Маер (Германија) 6:3, 6:4, 6:4
Второ коло: Маркос Багдатис (Кипар) 6:3, 6:1, 6:3
Трето коло: Александар Зверев (24., Германија) 4:6, 6:3, 6:7, 6:3, 6:2
Осминафинале: Гаел Монфис (6., Франција) 6:3, 6:3 4:6, 6:4
Четврт-финале: Милош Раониќ (3., Канада) 6:4, 7:6, 6:4
Полуфинале: Григор Димитров (15., Бугарија) 6:3, 5:7, 7:6, 6:7, 6:4
Финале: Роже Федерер (17., Швајцарија) ????
Патот до финале на Австралија опен 2017 на Роже Федерер
Прво коло: Јирген Мелцер (Австрија) 7:5, 3:6, 6:2 6:2
Второ коло: Ноа Рабин (САД) 7:5, 6:3, 7:6
Трето коло: Томаш Бердих (10., Чешка) 6:2, 6:4, 6:4
Осминафинале: Кеи Нишикори (5., Јапонија) 6:7, 6:4, 6:1, 4:6, 6:3
Четврт-финале: Миша Зверев (Германија) 6:1, 7:5, 6:2
Полуфинале: Стан Вавринка (4., Швајцарија) 7:5, 6:3, 1:6, 4:6, 6:3
Финале: Рафаел Надал (9., Шпанија) ????