Туристички автобус од српски превозник, кој пренесувал руски туристи, бил каменуван и ограбен во Скопје, пишува „Блиц“.
Но МВР предмалку соопшти дека било оштетено возачкото стакло на автобус, но истиот не бил ограбен.
„На 26.06.2021 во 09.10 часот во Полициската станица Центар, С.К.(47) од Република Србија пријавил дека во периодот од 19.20 часот на 25.06.2021 до 07.30 часот на 26.06.2021 непознат сторител со тврд предмет извршил оштетување на возачко стакло на автобус со српски национални ознаки, сопственост на превозно претпријатие од Бачка Паланка, Србија, кој тој го паркирал на паркинг простор на ул.„Филип Втори Македонски“. Според пријавеното, освен оштетување на стаклото, сторителот не одзел ништо од автобусот. Увид извршила екипа од СВР Скопје и се преземаат мерки за расчистување на случајот“, се вели во соопштението од МВР.
Според „Блиц“, руските државјани биле на патување на земјите во регионот, според раководителот на сообраќајот на компанијата. Автобусот бил паркиран во центарот на градот, а туристите и возачот заминале на спиење. Меѓутоа, се случил инцидент откако непознати сторители го оштетиле возилото и го исркшиле стаклото. Автобусот бил обиен и украдени се лични работи на патниците и возачот кои биле во автобусот.
Полицијата извршила увид. На искршениот прозор биле најдени траги од крв.
Поради штетите, туристите не можеле да го продолжат патот со возилото, па по нив дошол друг автобус.