Квалификациите за третата трка во домашниот автомобилистички шампионат на кружни патеки што денеска се возеа на патеката крај Кичево во сенка на немил настан. Членот на АКК „Кастм Кар“, Александар Кочевски (роден 1961 година) почина зад воланот на своето возило како последица на срцев удар.
„Во последниот круг на првиот дел од квалификациите во „Твинго Куп“, Кочевски поради срцев удар со смртни последици ја загубил контролата врз автомобилот и бавно завршил во зелениот појас крај патеката. Нашата екипа, судиите и медицинскиот тим веднаш му притрчаа во помош на Кочевски и веднаш беше пренесен во Ургентниот центар во Кичево каде и покрај напорите на медицинскиот персонал за негова реанимација, сепак, на крајот беше констатирана смрт“, се вели во соопштението на АКК „Кастм Кар“ во кое се изразува сочувство до семејството, фамилија и пријателите на Кочевски.
Колегите на Кочевски од „Твинго Купот“ го откажаа учеството во денешната трка, но планираните во останатите конкуренции за утре ќе се возат. Наредните три трки во сезоната на кружни патеки ќе бидат насловени „Ин Мемориам – Александар Кочевски“ во чест на денеска починатиот возач на АКК „Кастм Кар“.