На местото на кое што беше потпишан Преспанскиот договор ќе се гради Културен центар кој ќе ги промовира европските демократски вредности и ќе создаде простор за продлабочување и реализирање на идеите запишани со Преспанскиот договор.
Центарот е и иницијатива на локалната невладина организација „Преспа ГРАД“ која ги обединува сите граѓански потенцијали со идеи и желба за развој на проекти од значење за развој на регионот преспа во трите држави кои ги делат водите на Преспанското Езеро.
Фронтлајн направи интервју со архитектите и креатори на идејниот проект за овој Културен центар, дипломиран инженер архитект Ивана Белчева и доктор архитект Дамјан Кокалевски.
Во ова интервју, Ивана и Дамјан ни раскажаа каква ќе биде програмата, содржината и функцијата, од каде црпеле инспирација и какво значење ќе има овој проект за културниот развој и за граѓаните за кои е наменет.
„Идејата за Преспа форумот доаѓа од една поголема и поопсежна иницијатива чија што главна цел е формирање на платформа, односно нова институција која што ќе биде базирана на европските демократски вредности и која што ќе ги зрачи тие вредности. Идејата за Преспа форумот е всушност да се направи регионална соработка од една страна помеѓу трите држави, Република Северна Македонија, Грција и Албанија и идејата е да се опросторат сите тие вредности и критериуми кои што се запишани со Преспанскиот договор, а тоа се пред сè идеите за размени на идеи и искуства, за почитување, за регионална соработка и за промовирање на Европски вредности.“
„Мислам дека ова е прилика што еднаш во животот доаѓа. Мислам дека ваков проект е од исклучителна важност за целиот регион. Ние овој проект го гледаме како просторна врска буквално меѓу ЕУ и Северна Македонија и Македонија и регионот. Сметаме дека има огромен потенцијал преку градењето на ваков проект да станеме лидер во регионот во градење на меѓународни и добрососедски односи. На повеќе нивоа овој проект беше огромен предизвик за нас како млади архитекти, да имаме шанса да дадеме свое мислење за тоа како би требало една современа институција да функционира и да изгледа, е секако, неповторлива шанса“, изјави Дамјан.
„Навистина беше комплексна темата бидејќи требаше се да се спои заедно, да има еден тек, а од друга страна не сакавме да се наруши природата, околината, флората и фауната. Неговата употреба за околните граѓани ќе има многу големо значење затоа што од страна на македонскиот дел ќе биде отворена територија за трите држави каде што најпрво младите ќе имаат различна визија за тоа како се конструираат границите. Мислам дека ќе биде добар елемент што секој ќе може да го искористи за да работи на некаква теза, објект во кој што имаме дигитална библиотека, мислам дека во Македонија нема такво нешто, каде што ќе може да истражува, да биде дел од природата, а воедно да има и време за себе, да ги проба локалните јадења и да се запознае со локалното население.
Неговата цел е да стане една работилница за генерирање идеи, планови и нивна реализација“, вели Ивана.
