Членовите на комисијата кои биле избрани од Агенцијата за млади и спорт за збирката „Млади поети“ велат дека кај нив нема одговорност зашто биле објавени две песни со дискриминаторска содржина. Тихомир Јанчовски, член на комисијата, укажува дека тие требало само да одберат три најдобри песни, што ќе бидат наградени. На доделувањето на наградите, една од вработените на АМС рекла дека сите пристигнати песни ќе бидат објавени во книга.
 „По ова, никој од АМС не ни се јавил, ниту не’ консултирал за содржината на книгата, и за тоа кои песни треба да влезат или да не влезат во неа. Не сме добиле ни имејл, ни писмо, ниту некој не барал по телефон во врска со тоа. Не сме правеле никаква селекција, ниту некој од нас барал некаков извештај. Селекцијата на песните што се застапени во книгата не е направена од нас. Ние направивме избор на првонаградените три песни и толку“ напиша Јанчовски на својот ФБ профил.

Јанчовски додава дека биле  пристигнати 70 -80 песни, а дека се објавени 44: “Значи некој сепак направил селекција, но тоа не се членовите на комисијата”, вели Јанчовски.

Уште еден од членовите на Комсијата, Наталија Андова Шопова, исто така на Фејсбук потврдува дека  комисијата имала задача да додели три награди за најдобрите три песни:

„Тоа беше и единствената обврска на членовите на жирито, кои не учествуваа во уредувањето на збирката и селектирањето на песните што ќе бидат застапени во неа”, напиша таа, додавајќи  дека ги осудува „сите шовинистички и дискриминаторски ставови, и никогаш не би вклучила такви песни во кој било избор од ваков тип”.

Директорот на Агенцијата за млади и спорт Дарко Каевски претходно на прес конференција се обиде дел од вината да префрли врз членовите на комисијата кои според него требале да ги селектираат песните.

„Моите очекувања беа дека овие членови на стручната комисија ќе реагираат и нема да дозволат ваква содржина да биде објавена. За жал, тоа не се случи“ вели Каевски.

Каевски, кој е потпишан како уредник на збирката вели дека немал увид во содржината на песните. Тој најави истрага која треба да утврди чија е вината за направениот пропуст.

Но, приказната не завршува овде. По бурата реакции во јавноста, се огласи и студентот по фармација, Даниел Пиљаковски кој се води како автор на спорните песни, со тврдење дека тие не се негови, туку неговиот идентитет „го позајмил“ професорот по математика кој му бил ментор.

НОВА контактираше и со Александар Блажевски, математичар кој има освоено три бронзени медали на Меѓународните Математички Олимпијади во Истанбул, Хонг Конг и во Торонто.

Тој потврдува дека е автор на песните и дека го искористил името на Даниел Пиљаковски, бидејќи  не ги исполнувал условите на конкурсот.

„Во конкурсот се бараа два услови, едниот да се нема објавена збирка поезија (што го исполнував), а вториот беше за млади лица до 29 години, а јас се чувствував дискриминиран на моите 41 години, се чувствував замолчен од издавачите кои не покажале интерес за моето творештво“, вели Блажевски за НОВА.

Тој не очекува да има пријава против него за користење на туѓ идентитет и смета дека може да се спореди со Жорж Санд.

„Користењето на псевдоним (или туѓо име) не е нешто ново во литературата, најинтересен пример е француската новелистка Жорж Санд која пред 170 години користела машко име Жорж, во време кога жените не биле прифатени како автори. Од македонските примери најпознат е Рацин. Во науката е најпознат пример кога Алберт Ајнштајн објавувал научни трудови кои ги напишала неговата сопруга Милева“ смета Блажевски.

Блажевски вели дека во неговите песни нема говор на омраза и дискриминација и затоа биле одобрени. Според него членот 7 од Законот за клевета и навреда не се однесува на уметнички дела.

„Проблемите во нашето општество постојат и мора некој свиркач како мене да укажува на нив, па макар и преку поезија, наместо со пријавување на конкретни случаи до институции. Песните се напишани генерално, секој си ја има „мувата на капата“”, вели тој и додава дека многу бука се кренало без потреба.
 Поради песните на Блажевски „Партиски вработена“ и „Моите соседи“, АМС одлучи да ја стопира дистрибуцијата на збирката.