Министерството за одбрана на Азербејџан соопшти дека започна операција во регионот Нагорно-Карабах, кој е под контрола на Ерменија. Ова е регион кој долги години е предмет на спор и конфликт, пренесува АП.
Азербејџанските сили отворија оган врз ерменските позиции во регионот Нагорно-Карабах во, како што ја нарекоа „антитерористичка операција“, а етничките ерменски официјални лица објавија дека најмалку двајца цивили се убиени, а 23 се ранети во силен артилериски оган околу главниот град на регионот.
Според други извори, единаесет азербејџански полицајци и цивили загинаа во експлозија на мина и во уште еден инцидент. Во главниот град на Карабах беа пријавени сирени за воздушна опасност.
Министерството не соопшти веднаш детали, но нагласи дека позициите на првата линија и воените средства на вооружените сили на Ерменија биле „онеспособени со користење на оружје со висока прецизност“ и дека биле нападнати само легитимни воени цели.
Етничките ерменски претставници во Нагорно-Карабах рекоа во соопштение дека главниот град на регионот Степанакерт и другите села се „под интензивно гранатирање“.
Народниот правобранител за човекови права на Нагорно-Карабах, Геган Степанјан, изјави дека две лица загинале во оружениот напад – меѓу кои едно дете – а 23 се повредени. Најмалку осум од повредените се деца, потврди Степанјан.
Иако Азербејџан соопшти дека операцијата е ограничена на воени цели, Министерството за одбрана нагласи дека се создадени „хуманитарни коридори“ за „евакуација на населението од опасната зона“.
Двата соседa, Азербејџан и Ерменија, војуваа двапати за Нагорно-Карабах, прво во раните 1990-ти по распадот на Советскиот Сојуз и повторно во 2020 година. Од декември, Азербејџан де факто го блокираше единствениот пат до енклавата од Ерменија, познат како Лачински коридор.
Г. Т.