Нов голем скандал со местење на натпревари во светот на спортот. Случајот е во бадминтон, а главни ликови во него се поранешниот планетарен првак во јуниорска конкуренција, Зулфадли Зулфикли (25) и неговиот колега Тан Чун Сеанг (31), кои се соочуваат со шест обвиненија за манипулација на резултати. Двајцата ќе бидат сослушани од тричлена комисија на Светската бадминтонска федерација (СБФ) пред која ќе имаат прилика за „перење“ на образот“.
„Против нив има шест обвиненија за лажирање на резултати, а еден од таквите мечеви се одигра на корејското гранпри“, се огласи Јадаиш Чандра, адвокат на бадминтон федерација на Малезија.
Ако Зулфикли и Сеанг бидат прогласени за виновни, ќе се соочат со доживотна суспензија што ќе биде прва казна од таков вид во историјата на бадминтон. Шесте обвиненија, според „Њу Стрејтс Тајмс“, се однесуваат на исто толку турнири од 2013 година до 2016 година. Сомнителниот тандем беше пријавен во СБФ од играч кој добил понуда од нив за предавање на својот меч. Со ист „материјал“ располага и малезискиот адвокат Чандра кој располага со исти исказ од тројца сведоци од три различни држави.
„Четворица сведоци дадоа изјави. Пред осомничените ќе бидат изнесени обвиненијата за кои се товарат. Двајцата засега соработуваат со истражните органи“, нагласи Чандра.
Доколку случајот се затвори со доживотна суспензија, Зулфикли и Сеанг нема да можат да играат, тренираат или да учествуваат во некоја од постоечките бадминтон организации.