Изгоре куќата на познатиот хуманист Ален Ефовиќ од Бар кој секое лето им овозможуваше бесплатен одмор на преку 150 деца со пречки во развојот од регионот вклучувајќи ги децата од Македонија. Пожарот избил во 5 часот наутро и во целост го уништил приземјето на куќата.

„Во куќата немаше никој, а огнот се прошири и на останатите објекти во близина“, изјавил за Вјести, Велимир Ќаѓеновиќ началник на Службата за заштита и спасување.

Ефовиќ е претседател на  хуманитарната организација„ Хуманитарно семејство“ и веќе десет години, два пати во текот на летото ги отвора вратите за децата со посебни потреби. Во местото Добра вода, каде што се наоѓа куќата секоја година  летуваат деца од Црна Гора, Босна и Херцеговина, Србија и во последните пет години и деца од Македонија.

Ефовиќ  досега им овозможил бесплатно летување на преку 500 деца од Македонија кои доаѓаат во неговата куќа со придружба на членови на семејството. Преку оваа хуманитарна организација секоја година во јуни и во септември бесплатно летуваат деца со аутизам, со пречки во развојот, со телесен инвалидитет, со слепило.

„Тој е најголемиот хуман човек што го познавам, го сакам и почитувам како татко, ве молам кој може нека помогне да се санира неговата куќа, за повторно лицата со посебни потреби да можат да летуваати да уживаат во неговиот топол дом“, напиша на својот Фејсбук профил Беира Салифовска која има слепило.

Таа за НОВА раскажа како секоја година, редовно летува во куќата на Ефтовиќ.

„Таму се правеа, концерти, забави, тој ни овозможуваше се што ќе посакаме и редовно организираше излет во манастирот Острог“вели Беира.

Ефовиќ живее и работи во Париз. Неговата хуманост е позната пошироко и тој секоја сезона ја почнува и ја завршува со децата со пречки во разбојот за кои што обезбезбедува сместување, храна, лекарска помош доколку треба, им ги плаќа лежалките на плажа и се друго што им е потребно.

„Тој прави сето она што не го прави државата“, рече една мајка на која ова и единствена можност да го однесе нејзиното дете на море.

Бесплатно летување за децата со посебни потреби заедно со Ефовиќ организираат и неговите соседи. Сето тоа го прават на сопствен трошок и со помош на спонзорства од многу фирми.