Хозе Мануел Баросо, поранешен претседател на Европската комисија (ЕК) во текот на десет години од 2004 до 2014 година, ја прифати понудата на Голдман Сакс да работи за оваа американска бизнис банка.
Веста предизвика лавина незадоволни реакции во ЕУ. Особено околу фактот што оваа банка и помогна на Грција да поднесе лажни информации за својата финасиска ситуација во периодот кога Атина стана член на евро-зоната. Познато е дека овој фалсификат ја доведе Грција во ситуација на банкрот и таа е во основата на големата криза низ која минува оваа земја. Оваа ситуација ја доведе на работ на опстанок и целата евро-зона.
Освен тоа, Баросо во Голдман Сакс ќе добие огромна плата додека истовремено тој се уште прима апанажа како поранешен прв човек на ЕК која изнесува 15.000 евра што е 60 отсто од платата на претседателот на извшрното тело на ЕУ.
ЕК денес не сакаше да ја коментира оваа одлука на Баросо. Портпаролот на Комисија рече дека поранешните комесари мораат да известат во какви ангажмани влегуваат во текот на 18 месеци но потоа се ослободени од оваа обврска.
Според портапаролот, Баросо по телефон го известил сегашниот претседател на Комисијата за намерата да и се придружи на оваа банка. Но Жан-Клод Јункер не сакал да го коментира овој чекор на Баросо.
Оваа банка исто така е еден од актерите во финансиската криза од 2008 година.
Синдикатот на европските функционери реагираше на оваа номинација и во отворено писмо ги повика актуелните комесари во Брисел да ја осудат оваа одлука на Баросо која е “несоодветна”, вели синдикатот.
“Оваа номинација е во служба на личните финансиски интереси на поранешниот шеф на извршното европско тело и отвора етички прашања. Особено ако се сетиме дека Х.М. Баросо беше претседател на ЕК во текот на кризата од 2008 година која беше банкарска криза во која Голдман Сакс играше важна улога”, вели писмото на синдикатот.