„Петардата“ од Барселона во последното издание на „Ел Класико“ го разнесе Хулен Лопетеги. Екс селекторот на Шпанија доби отказ од Реал Мадрид и на негово место како привремено решение е назначен Сантијаго Солари кој досега работеше со Б тимот.
„Управата на Реал М. донесе одлука за прекин на соработката со Лопетеги. Потегот го повлековме со најголемо чувство на одговорност и со цел за менување на динамиката во првиот тим. Привремена замена за Лопетеги ќе биде Сантијаго Солари кој од денеска ја презема работата“, се наведува со соооштението на Реал Мадрид.
Лопетеги ја презеде клупата на Реал Мадрид ова лето по разделбата на клубот со Зинедин Зидан. „Кралевите“ ги предводеше на 14 меча, последниот го имаше во неделата на „Камп Ноу“ каде трикратниот европски шампион беше понижен со 1:5 што е петти пораз за тимот од „Сантијаго Бернабеу“ во шесте последни средби. Екипата моментно е деветта на табелата во Примера со 14 бода што е најлош старт во сезона по 2001/02.