Амбасадорот на САД во земјава, Џес Бејли денеска ги осуди актите на насилство и закани кон новинарите, поврзани со функционерот на ДУИ, Бекир Асани и неговиот брат, Бејтула Асани.
-Осудуваме акти на насилство и закани врз новинари, во една демократија нема место за вакви нешта, кои ја попречуваат борбата за слобода на изразување и слободата на медиумите – рече Бејли, одговарајќи на новинарско прашање за време на првиот годишен Форум на градоначалници во организација на Мировниот корпус на САД во Македонија и Министерството за локална самоуправа.
Во контекст на ова, Бејли се осврна и на неодамнешното убиство на словачкиот новинар Јан Куцијак и на неговата девојка.
– Понекогаш гледате до каде можат да одат работите, имајќи ги предвид неодамнешните немили настани во Словачка. Тоа е нешто што треба да загрижува и тука во Македонија, но и во целиот свет. Истовремено првичните инцидентите кои доведоа до оваа ситуација многу кажуваат за состојбата на неказнивост и многу е важно лидерите да се придржуваат до високи стандарди во поглед на владеењето на правото – рече Бејли.
Минатата недела Бејтула Асани му упати закани на претседателот на Здружението на новинарите на Македонија (ЗНМ), Насер Селмaни, откако тој на Фејсбук напиша дека „правната држава потклена пред еден силеџија подржан од ДУИ“. Реакцијата на Селмани следеше по инцидентот во кој функционерот на ДУИ, Беќир Асани нападна полициска службеничка која им асистираше на пајак-службите додека му го кревале возилото поради непрописно паркирање.
Веднаш по заканите на Бејтула, повторно реагираше Селмани дека нема да биде замолчан, по што следуваше интервју на Бекир Асани за Мактел, во кое претседателот на ЗНМ го нарече „копиле“ и „дно“.
Поради заканите кон Селмани, новинарите во понеделникот, неделава излегоа на протест пред Владата.
Двата случаи, за инцидентот со полицајката и заканите кон Селмани се во Основното јавно обвинителство Скопје, кое треба да донесе одлука дали ќе отвори истрага против Бекир и Бејтула Османи.