Како што кажа министерот, главната цел на оваа мерка за која и изминатите години имаше голем интерес е да им се овозможи на лицата со ниски приходи да искористат годишен одмор, и во исто време да им се помогне на туристичките центри во зголемување на обемот на работа надвор од туристичка сезона.
„За оваа мерка се обезбедени средства во износ од 64.000.000 денари (околу еден милион евра) односно ќе се издадат вкупно 3.555 потврди-ваучери за одмор за работници со ниски приходи. Право на учество на јавниот повик имаат сите физички лица кои се вработени и нивните месечни примања во семејството не го надминуваат нето приходот од 50.000 денари”, кажа Бектеши.
Според министерот Бектеши, потврдата за одмор на работници со ниски приходи ќе може да се искористи надвор од туристичката сезона во некој од угостителските објекти од Листата на пријавени угостителски објекти за сместување, објавена на веб страната на Министерството за економија.
„Потврдата за одмор на работници со ниски приходи ќе може да се искористи од моментот на добивање до 30 јуни 2024 година и од 15 септември до 01 декември 2024 година”, кажа министерот.
Како што кажа министерот за учество на Јавниот повик работниците со ниски приходи – баратели до Министерството за економија треба да достават:
- Барање кое ќе може да ги најдат на веб-страната на Министерството за економија или во Архивата на Министерството;
- Потврда од работодавецот за висината на исплатена плата и извод од банка за последните три (3) месеци за подносителот и на членовите на потесното семејство;
- Потврда од Агенцијата за вработување со која се докажува дека членовите на потесното семејство не се вработени;
- За членовите од семејството кои се над 18 години и се средношколци или студенти се доставува потврда од образовната установа;
- Фотокопија од лична карта и извод од матична книга за него и семејството;
- Доказ за членовите на потесното семејство (Извод од матичната книга на венчаните, потврда за развод или посмртница за член од семејството);
- Изјава дека барателот морално, материјално и кривично одговара за внесените податоци заверена на нотар.
Барањата со комплетна документација се доставуваат до Архивата на Министерството за економија, на ул. „Јуриј Гагарин” 15, Скопје најкасно до 29 Февруари 2024 година.