Нема покачување на цената на лебот, тврди министерот за економија, Крешник Бектеши.
Бектеши информираше дека од денеска почнува да се применува мерката за ограничени маржи кво трговијата на големо и мало, почнувајќи од производството па се до крајниот потрошувач.
„Од утрово постојано сме на терен. Констатиравме дека во најголем дел од маркетите цената на белиот леб и натаму се движи помеѓу 25 и 27 денари и не е забележано покачување на лебот“, вели Бектеши. Изјавата доаѓа по најавите на дел од производителите дека цената на лебот од денеска ќе се покачи за пет денари.
Министерот вели дека инспекциски служби на Државниот пазарен инспекторат вршат контроли кај трговците на мало, а оние кои кај кои ќе биде констатирано прекршување на одлуките на Владата ќе бидат санкционирани.
„Празните полици кај некои од трговците не се последица на некаква паника од страна на потрошувачите. Она што го утврдивме е дека некои од трговците сами ги повлекле производите во текот на викендот, со цел денеска повторно да ги вратат на полиците но со нови цени. Тие трговци ќе бидат санкционирани, ако мислат дека на таков начин може да манипулираат и со институциите и со потрошувачите. Покрај санкции, ќе подлежат и на редовни инспекциски контроли“, рече Бектеши и ги смири граѓаните дека ценовни шокови нема да има.
Тој ги повика трговците да ја почитуваат одлуката на Владата, бидејќи како што рече никој нема да загуби, а најмногу ќе добијат потрошувачите.
„Во делот на месото има мало зголемување на цените. Оправдувањето било дека овие производи биле преработени во нашата држава, а не дека се продава како месо од увоз, што не е точно. Нашите насоки до овие трговци е да ги вратат назад цените во рамки на она што е предвидено од страна на надлежните институции. Нема да дозволиме манипулативно да се зголемуваат цените, врз неосновани тврдења за наводни трошоци за преработка кои не се вистинити“, децеден е министерот.
Тој вели оти стоковите резерви и кај трговците и кај државата се стабилни и оти недостиг на храна нема да има. Министерот смирува дека актуелната ситуација во Украина нема директно да влијае врз нашата економија.
Според Бектеши, одлуката на Владата се носи со цел да не се презивика ценовен шок, односно зголемување на цените во маркетите, а министерот верува и дека дел од цените дополнително ќе бидат намалени.
Со најновата одлука на Владата, која стапува на сила денеска, се определува највисоката трговска маржа и тоа до 5 отсто на продажната цена пресметана во трговијата на големо, односно до 10 отсто на продажната цена во трговија на мало. Листата на прехранбени продукти е проширена со овошје и зеленчук.
Од денеска маржите се ограничуваат за лебот, шеќерот, солта, брашното – тип 400, суровото сончогледово масло и сончогледово масло за јадење, трајното млеко со масленост од 2,8, 3,2 и 3,5 отсто, свежото месо и сувомеснати производи, сирењето и урдата, оризот, јајцата, тестенините, пченицата и овошјето и зеленчукот. Кај трговците на мало во вкупниот износ на трговската маржа до 10 отсто се вклучени рабатот и надоместоците кои трговецот на мало ги наплаќа од трговецот на големо за рекламирање и за примарни и секундарни позиции за изложување на стоките на рафтови, односно полици.
Новата одлука, ќе важи до 31 мај годинава.
Во меѓувреме, веќе не е на сила владината одлука за замрзнати цени кај основните прехранбени продукти, која беше донесена на 5 декември.
(Б.Б.)