Суштинските (неопходните) работници како граничните агенти и војската можеби ќе бидат принудени да работат без плата во моментов – но владините службеници кои се сметаат за несуштински привремено се ставаат на неплатено отсуство. Во минатото, на овие работници потоа им била исплатена плата ретроактивно.
Би-Би-Си
Масовните отпуштања на американските федерални службеници ќе започнат во рок од два дена, соопшти Белата куќа, додека пратениците меѓусебно си ја префрлаат вината за првиот прекин на работата на владата (shutdown) по речиси седум години.
Запирањето на работата започна вчера, откако републиканците и демократите во Конгресот не успеаја да договорат нов план за трошење пред крајниот рок на полноќ.
Има малку знаци дека која било страна е подготвена на компромис, а гласањето за ставање крај на блокадата на владата пропадна само неколку часа откако започна.
Сенатот оттогаш ја прекина седницата, што ги зголемува стравувањата дека прекинот може да се одолговлекува и да загрози стотици илјади работни места, како и да ризикува да ја чини американската економија милијарди во изгубен аутпут.
На брифингот во Белата куќа вчера попладне, во реткото појавување на потпретседателот Џ.Д. Венс заедно со прес-секретарката Каролин Левит, ги обвини демократите за политички игри.
„Ако се толку загрижени за ефектот што ова го има врз американскиот народ, а треба да бидат, она што треба да го направат е да ја отворат владата, а не да се жалат за тоа како ние реагираме“, рече тој.
Во меѓувреме, Левит рече дека масовните отпуштања ќе се случат во рок од два дена. „Понекогаш мора да правите работи што не сакате да ги правите“, рече таа, додавајќи дека „демократите нè доведоа во оваа позиција“.
Тоа беше најновото обвинување во она што претставува жестока игра на обвинувања меѓу двете партии, при што водечкиот демократ во Сенатот, Чак Шумер, претходно ги обвини републиканците дека се обидуваат да ги „малтретираат“ демократите да го прифатат нивниот план за финансирање.
Демократите сакаат да обезбедат гаранции за финансирање на здравствената заштита пред да се согласат на договор за трошење, додека републиканците сакаат да користат привремена преодна мерка за да ја задржат владата отворена до средината на ноември и да ја финансираат на тековните нивоа.
Демократите рекоа дека дозволиле владата да престане со работа во обид да преговараат за да ги спасат здравствените бенефиции за Американците со пониски примања. Тие велат дека напорите за преговори со републиканците околу овие бенефиции досега биле неуспешни.
„Зошто ги бојкотираат преговорите? Никогаш не сум бил сведок на ова во мојот живот“, рече сенаторот Крис Марфи, демократ од Конектикат, за републиканците. „Работата е дека владата ќе се отвори кога републиканците сериозно ќе почнат да разговараат со демократите“.
Во меѓувреме, републиканците – кои ги контролираат двата дома на Конгресот, но немаат 60 гласа потребни за усвојување на законот за финансирање – рекоа дека овие проширувања на здравствената заштита не се приоритет, туку е одржувањето на владата отворена.
„Не се работи за тоа кој победува или кој губи или кој има вина и сето тоа“, рече лидерот на мнозинството во Сенатот Џон Тун. „Се работи за американскиот народ. А [демократите] го зедоа американскиот народ како заложник на начин што мислат дека им користи политички“.
Републиканците, исто така, тврдат дека продолжувањата на здравствената заштита што го бараат демократите ќе ги чинат американските даночни обврзници повеќе пари и дека биле воведени за управување со сложеностите од ерата на Ковид кои повеќе не постојат.
Суштинските (неопходните) работници како граничните агенти и војската можеби ќе бидат принудени да работат без плата во моментов – но владините службеници кои се сметаат за несуштински привремено се ставаат на неплатено отсуство. Во минатото, на овие работници потоа им била исплатена плата ретроактивно.
Аналитичарите очекуваат овој прекин на работата да биде поголем од последниот во 2018 година, кога Конгресот усвои некои закони за финансирање. Тие очекуваат дека приближно 40% од федералните службеници – околу 750.000 луѓе – ќе бидат ставени на привремено отсуство. Некои работници беа принудени да заминат на отсуство уште вчера. Но, администрацијата на Трамп се закани и со трајни отпуштања на федералните службеници.
„Да бидеме искрени, ако ова се одолговлекува“, рече Венс за време на брифингот во средата, „ќе мора да отпуштиме луѓе“.
Венс, исто така, изнесе тврдење – постојано негирано од демократите – дека прекинот на работата е резултат на тоа што високо рангирани демократи се залагаат за продолжување на здравствените бенефиции за мигрантите без документи.
Американскиот закон веќе им забранува на мигрантите без документи да добијат каква било федерално субвенционирана здравствена заштита. „Никаде демократите не сугерираа дека сме заинтересирани за менување на федералниот закон“, рече лидерот на малцинството во Претставничкиот дом Хаким Џефрис.
Расел Вот, шефот на Белата куќа за буџет, ги информираше републиканците зад затворени врати за тоа како би можеле да изгледаат претстојните отпуштања, иако јавните детали за тие планови се оскудни.
На Капитол Хил, немаше голем интерес за договор за ставање крај на застојот во средата.
„Нема што да се преговара. Нема ништо што можеме да извадиме од овој предлог-закон за да го направиме поштедлив или почист отколку што е“, рече републиканскиот спикер на Претставничкиот дом Мајк Џонсон.
Ново гласање за краткорочниот предлог-закон за финансирање предложен од републиканците се очекува утре.