Сите мигранти ги напуштиле двата кампа во близина на границата меѓу Белорусија и Полска, јави денеска белоруската новинска агенција „Белта“. Според агенцијата, зад мигрантите останале шатори, фрлена облека и запалени огнови.
Известувач на агенцијата ТАСС јави дека над 500 мигранти го напуштиле импровизираниот камп недалеку од транспортно-логистичкиот центар „Брузги“, а останале 300 до 400 од вкупно 2.000 колку што дошле пред 11 дена. Белоруски граничари во групи од 70 до 100 луѓе ги придружувале до транспортно-логистичкиот центар, оддалечен на еден и пол километар од границата.
На границите на Белорусија со Полска и со балтичките земји од летово е зголемен приливот на мигранти од Блискиот Исток и од Африка кои се обидуваат да влезат во Западна Европа. Ситуацијата ескалира на 8 ноември, кога на оградата се собраа повеќе од 2.000 луѓе и неколкупати се обидоа да ги пробијат бариерите.
Полските граничари употребија солзавец, по што мигрантите поставија камп во близина на контролниот пункт „Брузги“ во регионот Гродно.
Во понеделникот околу 3.500 луѓе минале од кампот до контролниот пункт и се стационираа на граничната линија, а наредниот ден почнаа и судири со полските безбедносни сили. Мигрантите фрлаа со камења и стапови, а тие одговорија со солзавец, шок бомби и водени топови.
Дел од бегалците во средата се преселија во транспортно-логистичкиот центар каде Белорусите организираа ноќевање, а дел се вратија во шумата.