Берлинскиот процес се врати во Берлин, Ковачевски со порака дека ЕУ не е целосна без Западен Балкан 

Самитот за Берлински процес е историски затоа што доаѓа во време на продолжена криза и од истиот се очекува да произлезат конкретни чекори кои ќе ја зајакнат регионалната соработка, рече премиерот Димитар Ковачевски, на Берлинскиот процес во Берлин, Германија. Во состав на делегацијата се и вицепремиерот за европски прашања Бојан Маричиќ и министерот за надворешни работи Бујар Османи.На дискусијата сите присутни изразија силна поддршка за членство на државите од Западен Балкан во ЕУ, со јасен став дека ЕУ нема да е целосна и успешна додека граѓаните од Западен Балкан не добијат пасоши со знамето на ЕУ. Воедно, присутните посочија дека Берлинскиот процес не е замена за членството во ЕУ, но е процес кој ќе обезбеди побрза интеграција на земјите од регионот.

Ковачевски на првата сесија рече дека денеска се исполнува клучен дел од обврските во рамките на заедничкиот регионален пазар, усвоени на Самитот во Софија пред две години, истакнувајќи дека сето ова е постигнато поради силната поддршка од владата на Германија, како домаќин на самитот на Берлинскиот процес, Европската комисија и интензивната комуникација на експертите и администрациите од земјите од Западен Балкан.

„Нашата меѓусебна политичка волја и посветеност за регионалната соработка е резултат на меѓусебно признаени интереси кои нѐ поттикнуваат да работиме на развој на заеднички регионален пазар и зголемување на атрактивноста на регионот за странските инвеститори“, истакна Ковачевски на сесијата.

Тој рече дека на земјите од Западен Балкан вклучувајќи ја и Македонија им претстои сериозна работа, затоа што дојде време кога ќе треба да се испорачаат суштински постигнувања во однос на подобрувањето на капацитетите, ефикасноста и конкурентноста на економиите и на регионот, што ќе доведе до забрзан регионален економски раст и развој.

Ковачевски посочи дека Северна Македонија ги почна преговорите со ЕУ со заштитени идентитетски позиции, во тек е скринингот преку кој забрзано ќе се одвива реформската агенда на земјата, но исто така истакна и дека Унијата не е целосна без земјите на Западен Балкан и во таа насока треба да се интензивираат сите иницијативи кои ќе придонесат кон приближување на регионот до ЕУ.Самитот на Берлинскиот процес кој годинава се одржува во Берлин прв пат по 8 години, има за цел да се интензивира соработката и регионалната поврзаност помеѓу земјите од Западен Балкан.

Лидерите од Западен Балкан заедно со претставниците на владите од земјите од ЕУ, Обединетото Кралство и претставници на Европската комисија во текот на денот покрај дискусијата за регионалната соработка и заеднички регионални пазари, ќе дискутираат и за енергетската стабилност и трансформација на Западниот Балкан, како и за перспективите на Берлинскиот процес и стратешките прашања.

С.К.