Движењето Беса нема да го поддржи Талат Џафери за претседател на Собранието, соопшти денес партијата.

“Движењето БЕСА ја информира јавноста дека нема да ја поддржи оваа кандидатура, бидејќи смета дека таа е наметната. Всушност, како што веќе сме најавиле претходно, ние сме имале наш предлог-кандидат со кредибилитет и без корупција, криминалност и прекршување на закон и ова го направивме во име на перспективата на земјата и на реформските и интеграциските процеси, но нашиот предлог не беше земен во предвид. Ова значи дека, пoмеѓу кандидат на БЕСА и на ДУИ, СДСМ одлучи да биде со ДУИ.”

Според нив, Џафери и неговата партија ДУИ не можат да донесат реформи во Македонија.

“Затоа не можеме да не истакнеме дека, според една албанска поговорка која вели „денот, по утрото се познава“, денес конечно паднаа маските да „реформска епоха“, за „уривање на режим“ и за „смена на курсот на земјата“. Бившиот министер на Никола Груевски, осудениот заради закана по смрт на службено лице во 2008 година, министерот кој, злоупотребувајќи ја својата службена должност, даваше хонорари по своја желба, за што доби сериозни забелешки и од Антикорупциската комисија на Р. Македонија, денес се предлага да биде прв човек што ќе остави белег на една реформска влада. Ако вака започнуваат реформите, тогаш можеме да се согласиме дека имаме погрешна перцепција за поимот реформа. Ако со ДУИ започнува првата алка на реформите, тогаш – ви благодариме – но, ние не сме за такви реформи”, вели Беса.

За Беса, ДУИ е партија која 10 години по ред му служела на Никола Груевски и заедно со него се главните виновници за оваа криза кои зад себе оставија монтирани политички процеси, сиромаштија, иселување, оддалечување од евро-интеграциските процеси, „Скопје 2014“ итн.

Беса додава дека останува посветена на “реформската агенда на земјата и на евро-атлантскиот курс на Македонија, за имплементација на Заедничката декларација на албанските политички партии, а – посебно – за имплементација на нашата платформа РЕДЕФИНИРАЊЕ, цврсто убедени дека таа е единствената агенда што овозможува Македонија да биде рамноправна, демократска, функционална и развиена држава”.