Во рамки на посетата на Вашингтон и средбите со светските финансиски институции, министерот за финансии Фатмир Бесими, како што соопшти денеска неговата прес служба, имал средби со извршниот директор на Светска банка Кун Давидсе, потпретседателката Ана Бјерде, регионалниот директор за Западен Балкан Линда Ван Гелдер и директорот на Светска банка за земјава, Масимилијано Паолучи.
Од страна на Светска банка, на средбата била покрената иницијатива за доделување нови средства во рамки на Проектот за подобрување на општинските услуги (МСИП), со цел институционално зајакнување на општините и за проекти за заштита на животната средина, на што македонската делегација одговорила позитивно.
Досега преку МСИП се добиени над 90 милиони евра за проекти на општините.
Светска банка во Северна Македонија активно работи на повеќе проекти проценети на близу 500 милиони американски долари. Нивната реализација и забрзувањето на динамиката на дел од нив, исто така, било тема на состанокот. Меѓу нив се Проектот за надградба и развој на патиштата, воспоставување на Интегриран информациски систем за управување со јавните финансии, поврзување на локални патишта, администрација за социјално осигурување, подобрување на основното образование, олеснување на трговијата и транспортот на Западен Балкан, како и проектот за одговор при итни случаи за Ковид 19.
Македонија има континуирана поддршка од Светска банка која е активна во земјава од 1993 година и досега има обезбедено подршка од над 2,8 милијарди американски долари во реализција на 65 проекти. (С.К.)