Економско закрепнување, зелена транзиција и модернизација на енергетскиот сектор, подобрување на образовниот систем, здравството, пазарот на труд и социјалната вклученост, како и дигиталната транзиција и зајакнување на конкурентноста на домашните компании и нивно интегрирање во глобалните синџири на вредност се главните предизвици поставени со Програмата за економски реформи во следниот тригодишен период.
– Поставените приоритети и мерките вклучени во нив се во линија со приоритетите и препораките на Европската комисија за земјата. Во насока на економското закрепнување се и активностите предвидени за фискална одржливост во наредниот среднорочен период, со истовремена поддршка на капиталните инвестиции, а во согласност со Планот за фискална одржливост и поддршка на економскиот раст, како и Планот за забрзан раст и Интервентниот инвестициски план, заклучиле на денешниот состанок претставниците на Европската комисија на средбата со министерот за финансии Фатмир Бесими.
Од страна на Европската комисија, како што соопшти Министерството за финансии, присуствувале Михаела Матуела, директор на Директоратот за Западен Балкан во рамки на Генералниот директорат за соседска политика и проширување, министерот за финансии, заменикот на претседателот на Владата задолжен за економски прашања, министри од Владата, како и претставници од Генералниот директорат за економија и финансии и од Директоратот за вработување и социјална политика.
– Од страна на Михаела Матуела беше истакнато дека ваков формат на економски дијалог во регионот се води само со нашата земја, со што од наша страна се дава силен сигнал до ЕК за нашата посветеност за процесот на преговори, каде програмата за економски реформи има клучна улога и претставува оперативна алатка за спроведување на структурните реформи, кои се предуслов за користење на финансиските средства од Економско-инвестицкиот план на ЕУ за Западен Балкан, информира Министерството за финансии.
Двете страни ја истакнале важноста на дискусијата за заедничките заклучоци кои во рамки на Економско-финансискиот дијалог со ЕУ треба да се усвојат во мај годинава.
Министерот за финансии Бесими посочил дека заеднички усвоените заклучоци со препораки во мај, ќе бидат основа за подготовка на следниот буџет, во насока на вклучување на неопходните реформи на министерствата во нивните буџетски планови. Потенцирал и дека програмата на економски реформи претставува значаен документ за воведување на концептот „вредност за пари“ во буџетскиот процес.
Заеднички е оценето дека напорите во наредниот период треба да се насочени кон постепена фискална консолидација, со истовремено водење грижа за имплементација на капиталните инвестиции потребни за зелена транзиција, зајакнување на човечкиот капитал преку подобрување на правната рамка за пазарот на труд, квалитетот на образовниот систем и социјална вклученост, како и продолжување на активностите за дигитализација на јавните услуги, рационализација на парафискалните давачки и намалување на неформалната економија.
Програмата за економски реформи, министерот за финансии ја достави до ЕК на 29 јануари. Нејзината цел е преку конкретни реформски мерки да се дејствува на клучните предизвици за конкурентноста на земјава во рамки на дијалогот со Европската Унија за исполнување на економските критериуми.
– Програмата е најважен стратешки документ во економскиот дијалог со Европската комисија и земјите членки на ЕУ. Програмата содржи среднорочна рамка на макроекономската и фискалната политика и структурни реформи што треба да придонесат за зголемување на конкурентноста на економијата и за креирање работни места, велат од Министерството за финансии.