Градежната компанија „Бетон“ и во наредните две години ќе се грижи за одржување на спомениците и фонтаните од проектот Скопје 2014. Оваа фирма во сопственост на бизнисменот Минчо Јорданов повторно го доби тендерот од Град Скопје во вредност од 861.000 евра.

Градската власт на Коце Трајановски од 2014 година ги презеде  спомениците и фонтаните од општина Центар и оттогаш секоја година на јавен повик избира оператор кој ќе се грижи за нив и секој тендер го добива „Бетон“.

Во 2014 „Бетон“ бил единствен понудувач, а тендерот „тежел“ 325.000 евра. И на повикот во 2015 „Бетон“ немал конкуренција и си добил 488.000 евра од градската каса. На тендерот оваа година за прв пат освен фирмата на Јорданов, се јавила уште една компанија, но повторно бил избран „Бетон“ како најповолен понудувач, кој сега си се обезбеди со 861.000 евра во наредните две години.

„Фирмата Бетон има обврска во наредните две години да ги одржува сите споменици во централното градско подрачје, специфицирани по список.   Станува збор за редовно одржување на фонтаните и на целокупниот број на спомен обележја поставени на плоштадите, мостовите и фонтаните во централното градско подрачје.“, изјавија за НОВА од Град Скопје.

А.Д. Бетон – Скопје освен од одржување на спомениците, искешира најмногу пари и од изградбата на проектот Скопје 2014. Според податоците што ги објави Призма во истражувањето „Скопје 2014 под лупа“ , Бетон е најголем изведувач со 31 објект или во пари тоа се повеќе од 191 милиони евра на контото на Јорданов.

beton 1
фото Призма

Според оваа база на податоци, во рамките на проектот Скопје 2014 се изградени две фонтани ( фонтана на плоштад Македонија и во Вардар), како и 34 споменици, за чие одржување во наредните две години ќе се грижи Бетон.

1minco3
сопственикот на Бетон – Минчо Јорданов е втор најбогат Македонец

Минчо Јорданов три години по ред беше прогласуван за најбогат македонски бизнисмен од магазинот „Форбс“. Оваа година од тронот го симна сопственикот на „Орка холдинг“ Орце Камчев, кој му „избега“ на Јорданов со 3 милиони евра повеќе. Богатството на Јорданов се проценува на 22,5 милиони евра, колку што чинат неговите фирми Макстил, Бетон и Факом.