Освојувачите на олимписки медали на Игрите во Токио нема да бидат одликувани од официјални лица со ракување или прегратки, туку сами ќе ги ставаат медалите околу својот врат, соопшти претседателот на МОК, Томас Бах.
– Медалите на освојувачите ќе бидат донесени на послужавник, а потоа спортистите самите ќе ги земат своите одличја и ќе ги стават околу својот врат. Лицето кое ќе ги става медалите на послужавникот, ќе носи заштитна маска и ракавици. Нема да има прегратки, ниту ракување за време на свеченото доделување на медали. Заштитни маски на лицето ќе носат и освојувачите на медали, изјави првиот човек на Меѓународниот олимписки комитет (МОК) на средба со новинарите во Токио.
Олимписките игри во Токио ќе бидат отворени на 23 јули, а ќе траат до 8 август до кога во јапонската престолнина е прогласена вонредна состојба поради пандемијата на коронавирус. Епидемиолошката состојба во градот домаќин на Олимпијадата се влошува и во средата беа регистрирани 1.149 новозаразени лица, што е најголем број во последните шест месеци.