Денес се одбележуваат 22 години од геноцидот во Сребреница, во кој околу 8.000 луѓе беа убиени од војската и полицијата на Република Српска, како и паравоени формации, над Бошњаците во „заштитената зона на Обединетите нации“.

Нападот на Сребреница почна на 6 јули 1995 година, а заврши пет дена подоцна кога силите на војската на Република Српска, под команда на генералот Ратко Младиќ, влегоа во градот.

Во 2007 година, Меѓународниот суд во Хаг го квалификуваше масакрот во Сребреница како геноцид. Резолуции со кои ја потврдуваат пресудата донесоа парламентите на земјите членки на Европската Унија, Канада, САД и Австралија.

Резолуцијата за Сребреница не е усвоена во Советот за безбедност на Обединетите нации во 2015 година откако Русија го искористи своето право на вето со што го „собори“ британскиот предлог.

За злосторствата во Сребреница обвинети се лидерите на босанските Срби, Радован Караџиќ, и генералот Ратко Младиќ.

Караџиќ е уапсен во јули 2008 година, а Младиќ во мај 2011 година.

Судот во Хаг во март 2016 година за злосторствата во БиХ го осуди Караџиќ на 40-годишна затворска казна, додека судењето на Младиќ сè уште трае.

Обележувањето на годишнината во Меморијалниот центар во Поточари се одвива денеска претпладне.