Бројот на починати од корона-вирусот во Кина се искачи на 106, а потврдено е дека над 4.500 лица се заразени, пренесува „Си-Ен-Ен“, наведувајќи дека американските власти веќе ги предупредија граѓаните да не патуваат во Кина доколку не е неопходно. Светските агенции јавуваат и за првата жртва во Пекинг.
Властите во Хубеи, кинеската провинција каде што е жариштето на епидемијата, соопштија дека се потврдени уште 1.300 нови случаи на заразени, од кои поголем број се сместени во болница, а 125 од нив се наоѓаат во тешка состојба.
Американскиот Центар за контрола и спречување болести издаде предупредување за патување од трето ниво, наведувајќи дека треба да се избегнува секое патување во Кина што не е неопходно. Притоа се посочува дека кинеските власти воведоа карантин и го ограничуваат патувањето низ земјата.